60-inik ukiulik, Naja Lyberth kalaallit arnat amerlasuut 1960-ikkut 1970-ikkullu ingerlaneranni spiralilersorneqarsimasunut ilaavoq.Assi: KNR

Naja Lyberth spiralilersuisoqarsimanerata kingorna: Attortisimasorujussuuvunga

Kalaallit arnat 1960-ikkunni 1970-ikkunnilu spiralilersortissimasorpassuit kingunerluuteqarnerminnik katsorsarneqarnissaat pisariaqartinneqarpoq. Naja Lyberth DR-ip saqqummiussaani pingaarnertut inuttaasoq taama isumaqarpoq.

Naja Lyberthip imaq tungutsorissoq qaqqallu qaqortut tunuliaqutaralugit Ilulissanit iphonekkut eqqissimalluni nuisavoq.

Oqaaserli eqqissisimasoq Naja Lyberthip misigisimasaanik nassuiaatigissallugu eqqortuunngilaq.

DR-ip Spiralkampagnenimik tassa spiralilersuisoqarsimaneranik oqaluttuamik qaammammi matumani saqqummersitsinerata kingorna nunatsinni amerlasuut tamanna oqaluuserivaat. Oqaluttuami kalaallit niviarsiaqqat arnallu 1966-imit 1970-ikkut ingerlanerannut spiralilersorneqarsimanerat saqqummiunneqarpoq.

Tusarnaagassiaq Spiralkampagnen
 

  • Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip podcastimik tusarnaagassiliareqqammisaani erserpoq.
  • 1966-ip 1975-illu akornanni kalaallit niviarsiaqqat tuusintilikkaat spiralilersinneqarput.
  • 1966-ip 1970-illu akornanni spiralilersinneqartut 4.500-upput.
  • Kalaallit Nunaanni arnat naartusinnaasut taamani 9000-upput.
  • Aperineqaqqaaratik spiralilersinneqarsimasuni arlallit tarnikkut timikkullu kingunerlutsitserujussuarnerannik kinguneqartumik qinigassinneqarsimanngitsutut misigisimapput. Anniaatigalugulu kingunerluutigisimagaat arlallit oqarput.
  • Niviarsiaqqanut ukiukitsunut, angajoqqaavi akuersiteqqaarnagit, spiralilersuineq danskit suliniuteqaleruttorneranni inatsisitigut akuerisaanngilaq. Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit allanngortinneqarpoq. Tamanna nakorsat niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimavaat. Tassa imaappoq, nakorsat inatsisinik unioqqutitsisimapput.
  • "Spiralkampagnen" P1-ikkut maajip ulluisa arfineq-pingajuanniit tusarnaarneqarsinnaalissaaq.

    Tusarfik: DR-podcast "Spiralkampagnen"

 

AAMMA ATUARUK Pinngitsaaliissummik spiralilerneqarsimasoq: - Soorlu savinnik illissakkut kapoorneqarlunga

Naja Lyberth taakku ilagaat. Taanna taamani 14-inik ukioqartoq atuaqatai niviarsiaqqat ilanngullugit Maniitsumi nakorsaasimasumit spiralilertinnissamik ilisimatinneqarput. Naja Lyberth ullumikkut 60-inik ukioqartoq taamani naaggaarsinnaasutut misigisimanngilaq.

Allattorpassuusut

Spiralilersuisoqarsimanera pillugu oqaluttuap saqqummernerata kingunerisaanik arnarpassuit taannatulli nalaataqarsimasut allaqattaarput. Arnat Naja Lyberthip Facebookimi oqalliffissatut qupperniliaani ilaatigut allagaqarput.

- Amerlasoorujussuit qisuariarput, pingaartumik naartulersinnaannginnerminnik, akussakkut ajornartorsiuteqarnerminnik, mannissap aqqutaasa milinnganerannik imaluunniit sooq illiaarsittariaqarnerminnik maanna paasisaqartut. Qisuariaatit sakkortupput paasinarluinnarpulli, Naja Lyberth ilungersortumik isikkoqarluni oqarpoq, nangillunilu:

- Naak uanga aamma nammineq eqqugaagaluarlunga attortisimasorujussuuvunga. Kisianni imminnut nassaaraluta ataatsimoornerput iluaqutaasorujussuuvoq. Ilatta qanoq nalaataqarsimanerput maanna paasivaat.

Arnat kingunerluuteqarnerminnik katsorsarneqarnissamut periarfissaqassasut

Spiralilersuisoqarsimanera kalaallit inuiaqatigiit akornanni ukkatarineqangaatsialerpoq. Kalaallit politikeriisa arlallit oqaluttuaq “tupannartoq”, “naakkittaatsoq” aamma “annilaarnartoq” oqaatigaat. Spiralilersuisoqarsimanerata qulaajaaffigineqarnissaa Naalakkersuisut maanna piumasaraat.

Tamannalu Naja Lyberthip nuannaajallaatigaa.

- Politikerit uagut pilluta iliuuseqarsinnaasut pisariaqartippagut, taanna oqarpoq.

AAMMA ATUARUK Politikerit spiralilersuineq pillugu: Tupannarpoq, naakkittaappoq annilaarnarlunilu

Naja Lyberthimmi spiralilersuisoqarnerata nalaani nunatsinni politikeriusimasut tamanna ilisimasimagaat paasigamiuk pakatsingaatsiarpoq.

Naa Lyberth nangilluni oqarpoq:

- Arnarpassuarnut kinguneqartitsissutaasunut iliuutsinut illersorneqannginnerput uagutsinnut kingunerluuteqartitsivoq.

Naja Lyberthip oqarnera naapertorlugu arnat spiralilersuisoqarnerani ilaasimasut katsorsarneqarnissamik neqeroorfigineqarnissaat pingaaruteqarpoq. Taanna nammineerluni tarnip pissusianik ilinniagaqarlunilu kingunerluuteqarnermut katsorsaasuuvoq, taassumalu ilinniarnini nammineq spiralilertissimanerminik kingunerluutinik suliaqarnissaminut iluaqutigisimanerarpaa.

AAMMA ATUARUK Inuit pisinnaatitaaffii pillugit siunnersuisoqatigiit: Danmarkip kalaallit inuttut pisinnaatitaaffii innarlerpai

- Arnat nunatsinni sumiiffinni allaniittut kingunerluuteqarnerminnik katsorsartipallassinnaanissaat neriuutigaara. Isumalluutinik naammattunik imminut isumaginissannut pissarsivunga, kisianni qasuvunga, politikeriniillu oqartussaniilluunniit akisussaaffiup nanginneqarnissaa pisariaqartippara, Naja Lyberth sapaatip akunnerani kingullermi ukkataqartoqarneranut qisuariaateqarluni oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl