Facebookimi akerliuniaqatigiit 900-nik ilaasortallit piumasaraat: “Nagguteeqqat manngernerulerlik!” Aamma Atuagalliutini nagguteeraq soqutigineqarluartoq taanna allaaserineqaqattaarpoq, nagguteeranngersunit oqaatigineqarluni nagguteeqqat silaannaqarpallaalernertik, aqippallaarnertillu pissutigalugu soqutiginarunnaartut.
Maannali tusaruminartunik nutaarsiassaqarpoq!
AG-mi ullumikkut saqqummersumi allaaserineqarpoq, Danmarkimi kaageeraliorfik Bisca, nagguteeraliortartuusoq, akerliunianut tusaanialersimasoq, pingaarutilimmillu aalajangiisimalluni.
- Assigiinngitsunik pingasunik misiligutissanik nagguteeraliorniarpugut, taakkulu misilitassanngorlugit AG-mut nassiunniarpavut, Biscami tuniniaanermut pisortaq oqarpoq. Ataaseq ullumikkut nagguteeraliarineqartartutut iinnassaaq, allalli marluk manngernerussapput.
Nagguteeqqat misiligutissat tikippata misiliinissamut AG-p isumagisassaanut, Brugsenimit, Pisiffimmit Facebookimilu akerliuniaqatigiit aallartitaanik peqataasoqassaaq.
Misiliinerup inernera siunissami nagguteeqqanik tunisassiornermi atorneqalissaaq.