Naggueqativut uumasunik illersuiniaqatigiiffimmit saassunneqarput

Akilinermi naggueqativut Mitsimatalimmiut sapaatip akunnerata siuliani qilalukkanik qernertanik sassanik 560-inik pisaqarput. Qilalukkat ammalatamit issimaffigisaminnit qimagutsinneqarsinnaanngimmata, pisarineqarput nunaqarfimmiunillu pilluaatigineqarlutik.

Canadami naalakkersuisut akuersissuteqarnerisigut nunaqarfimmiut taamaaliorput,

Kisianni tamanna Canadami uumasunik illersuiniaqatigiinnit qassiiliuutigineqaqaaq. Paul Watson uumasunik illersuiniaqatigiiffimmi Sea Shepherd Societymi siulittaasuusoq oqarpoq, naggueqatigiit Inuit uneriffiup naqqata taarneratulli taartigisumik uummateqartut aamma naggueqatigiit Inuit tiaavuluusut soqutigitsaalluinnartuusullu. Taassuma oqaasii Canadami tusagassiorfippassuarni saqqummiunneqarput.

Tamannali Mary Simonip Inuit Tapiriit Kanatami siulittaasuusup Watson oqaatsit sakkortuut atorlugit assuaraa, piumasaralugulu taanna uumasunik illersuiniaqatigiiffimmit The Sea Shepherdimit siulittaasuuffigisaminit soraarsitaassasoq.