Naggueqativut utoqqatserfigineqarput
Stephen Harperip Issittumut ukiumoortumik angalanini sapaatip akunnerani uani naammassivaa.
Qausuittumi, tassa Resolute Bayimi, naggueqativut utoqqasaat utoqqaallu, ukiut 50-it matuma siorna pinngitsaalisaallutik nuutsitaasimasut, akunnittarfimmut aggeqqusaapput. Ministeriunerup, Nunavummi Inatsisartunut ilaasortaq, Leona Aglukaq, peqatigalugu, naalakkersuisut sinnerlugit, pinngitsaalisaallutik nuutsitaasimerminnut atatillugu utoqqatserfiginiaraatik paasigamikku, taakku tupaallaqaat.
Ministeriuneq utoqqatserpoq, utoqqatsissutillu nuutsinnera naggueqatitsinnut arfineq-pingasunut taakkununnga tunniuppaa, ukiorpassuillu matuma siorna pisimasut qanoq misigisimaneraat kingornatigut apersuutigaa. Naggueqativut utoqqatserfigineqartut arfineq-pingasut taakku naapissinnaagamigit Stephen Harperip tulluusimaarutigineraraa, aviisimi Globe and Mailimi allaaserineqarpoq.
Harperip Inuvimmi tusarliuppaa, qilalukkanut qaqortanut eqqissisimatitsivissamik nutaamik pilersitsisoqassasoq. Taanna taaguuteqassaaq Tarium Niryutait Marine Protection area, kuussuarmilu Beaufortip imartaata sineriaata qanittuaniittumi, Mackenziemi, 1800 kvadratkilomerinik annertussuseqartumiissasoq.
Eqqissisimatitsivissap inissisimaffissaa qilalukkanit qaqortanit ornigarneqarluartuuvoq, tassami upernaakkut aasakkullu tamaanga piaqqiarttkaasaramik. Tamaani aalisarneq piniarnerlu inerteqqutaalissapput, Inuvialuilli pisarnertik malillugu piniariaasiat ataqqineqassasoq neriorsuutigineqarpoq.
Stephen Harperip ukiumoortumik angalanini naggaserlugu ilisimatitsissutigaa, Issittumi qaammataasakkut alapernaarsuutissanut nutaanut 2,5 milliardit koruuninik Canada aningaasaliiumaartoq.
