Naggueqativut Ruslandimiittut sunniuteqarusoqaat
Ruslandimi katuffiup Raiponip Ruslandip avannaani Sibiriamilu nunap inooqqaavi assiginngitsut 40-t, 200.000-it missaannik inoqartut, sinniisuuffigai.
Raiponip siulittaasuata tullia, Rodion Sulyandziga, kattuffini, Issittumi Siunnersuisoqatigiinni aalajangersimasumik ilaasortaasoq, sinnerlugu maanna Nuummiippoq. Naapiinnarlugu malunnarpoq, angut oqaloqatigisaminik narrujuummisitsinaveersaallaqissuusoq. Oqaasissani sianigeqqissaarlugit qitiusumi oqartussanut pissuseqarnertik najummassimanartoq oqaluttuaraa.
Ruslandip avannaani nunap inoqqaavi Moskvami tusaaniarneqarneq ajortut ilisimaneqarpoq. Taava Rodion Sulyandzigap Ruslandip nunanut allanut tunngasunut ministeria Sergei Lavrov inimi ataatsimeeqatigileruniuk qanoq iliussava?
-Naalakkersuisunik suleqatiginninnerunissaq soorunami soqutigaarput, pissutsit assigiinngitsut killilersuinerillu atuupput. Naalakkersuisut assigiinngitsut uagut tusarnaassavagut, kisianni aamma taakkua tusarnaartariaqarpaatigut, Rodion Sulyandziga oqarpoq nangillunilu:
- Inatsiserpassuit nunap inooqaavisa pisinnaatitaaffii qularnaarpaat, atuutsinniarneqaleraangatali susoqarneq ajorpoq. Tassalu naluaaruteqartarneq piviusumillu susoqartarnera assigiinngeqaat.
Ruslandimi nunap inoqqaavi nunat piitsooqaat, nunallu immikkoortui imminnut ungaseqaat tamaakkamillu assigiingeqalutik.
Aamma paarlangasoqarpoq; tassami nunap inoqqaavi, sumiiffinni pissussutinik uumaatsunik peqarluartuni najugaqartut, aningaasatigut piitsuunerpaapput.
Taaamaammat aatsitassarsiorneq pillugu iluameersumik inatsisiliortoqarnissa siunertaralugu, Raiponip oqalliffiit tamaasa atorlugit naalakkersuisut kimigiiserfigai.
- Issittoq uuliamut, gassimut aatsitassarsiorfinnullu atugassaanngilaq. Issittoruna uagut angerlarsimaffipput, Rodion Sulyandziga aalajangersimarpalulluni oqarpoq.
Tassalu uuliamik gassimillu qalluiniarluni aatsitassarsiorniarlunilu pilersaarutit angisuut Ruslandip avannaani Sibiriamilu nunap inoqqaavinut unammilligassaasut annerpaat, Rodion Sulyandziga isumaqarpoq:
- Aningaasarsiornikkut ineriartornerup unitsinnissaa kissaatiginngilarput. Uaguttaarli nunaqarfitsinni aningaasanik aamma nammanneqarsinnaasumik ineriartornissamik pisariaqartitsivugut. Kisianni suliffissuaqarnikkut ineriartorneq qangatullu ineriartorneq oqimaaqatigiittariaqarput, oqarpoq.
Maannalu ujartorpaa, aatsitassarsiornerup aqunneqarnissaanut naalakkersuisut eqiinganerunissaat. Maannakkutummi itsillugu Aatsitassarsiortut ingasalluinnartut, Rodion Sulyandziga isumaqarpoq:
- Uatsinnut ajornartorsiuterujussuuvoq. Piginneqatigiiffissuit nunallu inoqqaavisa imminnut qanoq pissuseqarfigeqatigiinnissaanut aqutsisussamik iluameersumik inatsiseqanngilaq. Ajornannginaarisaqaat. Piginneqatigiiffik aatsitassanik ujarlernissamut akuersissummik pigaangat, tallit siaarlugit tikilluaqquneqartarput. Tassami aningaasaateqaqaat. kisianni nunami atuisinnaatitaaneq pillugu ajornartorsiuteqalertarpoq, taavalu nunap inoqqaavi piginneqatigiiffissuillu aporaatilertarlutik.
Tamatumanilu naalakkersuisut akuliullutik malittarisassiortariaqarput. Naalakkersuisulli qitiusumillu allaffeqarfimmiut piginneqatigiiffissuarnut illersuisarput, taakkua aningaasaateqarnerullutillu sunniiniarsinnaanerummata.
