Naggueqativut puffassimaartut
USA aalajangerpoq suulluunniit nannup pisataaneersut eqquteqqusaajunnaassasut, naak amerikami eqqissisimatitaanissat pillugit pisortat nassuerutigigaluaraat nannut piniarneqarnertik pissutiginagu nunarsuatsinnili silaannaap kissakkiartornera pissutigalugu ulorianartorsiortinneqartut.
Amerikamiut eqqusseqqusiunnaarnerat Nunavumi piniartunut kinguneqarnerlutussaavoq, amerikamiut takornariat 30.000 dollarseertillugit, tassa 150.000 koruuneersillugit piniartinneqartaraluarmata.
Nunavumi naalakkersuisut amerikamiut aalajangernerat assuaraat, nannut pillugit inuit ilisimasaat suusupagineqarmata.
- Nunavumi naalakkersuisut siulittaasuat, Paul Okalik aviisimut Canadian Pressimut oqarpoq, nannut aatsaat taama amerlatigisutulluunniit oqaatigisariaqartut.
Nunavumi illoqarfimmi, Kangiqtiniq-mi pinngortitap allanngutsaaliniarneranut pisortaqarfimmiit, Gabriel Nirlungayuk oqarpoq amerikamiut takornariat piniartinneqarsinnaajunnarpata nunaqarfeeqqat ilaannut tamanna 1,7 milliuuni dollarsinik, tassa 8 milliuuni koruuninik annaasaqaataasalissasoq.
Nannut ulorianartorsiortinneqalissagaluarpata pisuusussanut, uuliamik gassimillu qalluisunut, nunarsuatsinni silamik kissakkiartortitsisunut amerikamiut aalajangernerat sunniuteqassanngilaq. Inunnulli piniartunut pissaatikinnerusunut, inuiaqatigiinnguakkaarlutik inuusunut eqquinerlussalluni, Canadian Press allappoq.
