Naggueqativut oqaasissaqaqataarusupput

Naggueqatigiit Inuit suliniaqatigiiffiat nutaaq Nunavummi pilersinneqarpoq. Suliniaqatigiiffik ateqarpoq Nunavut Resources Corporation.

Naggueqatigiit suliniaqatigiiffiata Kitikmeot Inuit Associationip, maanna siulittaasua Charlie Evalik, Nunavut Resources Corporationimi siulittaasunngussaaq, Nunatsiaq Newsip nittartagaani tamanna atuarneqarsinnaavoq.

- Nunavut Resources Corporationip pilersinneqarneratigut Canadap avannarpasinnerusortaani suliniutinut naggueqatigiit Inuit isiginnaaginnartuuginnaratik akerlianillu peqataanerulerlutillu oqaasissaqaqataanerulernissaat neriuutigaarput, suliniaqatigiiffik nutaaq tusagassiutinut nalunaarummi allappoq.

Aatsitassarsiornikkut suliaqarnermi naggueqatigiit inuit tunulliunneqartarput, suliniaqatigiiffiup siulittaasua Charlie Evalik oqarpoq, suliffeqarfiit Nunavup avataaniittut aatsitassarsiornermi maanna aningaasarsiornerunerat tikkuarlugu.

Aningaasarsiornermi aatsitassarsionermilu immikkut ilisimasallit Nunavut Resources Corporationip siulersuisuini ilaasortaanissaat siunniunneqarpoq, qaammatillu tulliuttut ingerlanerini toqqarneqarumaarlutik.

Nunavup kippasinnerusortaani Iqaluktuutsiami siorna ataatsimiittoqarmat Nunavut Resources Corporationimik pilersitsinissaq siullermik saqqummiunneqarpoq.