Naggueqativut inuktitut ilinniassapput
![](/sites/default/files/styles/image_934x467/public/article_images/nunavut_skoleboern_630.jpg?itok=yC4uuG7J)
Canadap naalakkersuisuisa, nunap immikkoortortaasa kiisalu nuna tamakkerlugu inuit suliniaqatigiiffiisa suleqatigiinnerisigut periusissaq nutaaq pilersinneqarpoq.
Ilinniartitaanikkut periusissaq nutaaq pisariaqarluinnarpoq, tassami Nunavummi atuartut 75 procentiisa atuarnertik naammassinagu atuarfik qimattarmassuk. Nunavimmi, Nunatsiavumi kiisalu Inuialunni taamaatiinnartartut aamma amerlasoorujussuupput.
Naak periusissaq aatsaat sisamanngorpat saqqummiunneqartussaagaluartoq taammaattoq inassuteqaatit quliusut ilisimaneqareerput. Inuit ilinniartitaanerannut takorluukkat nutaat, oqaatsinut marluinnut atuuttussaq, inuktitut kiisalu tuluttut franskisulluunniit Canadami ilinniartitaanermut periusissami takorloorneqarpoq.
Marluinnik oqaaseqartuuneq sivisuumik akerleriissutaanikuuvoq. Inuit inuusuttut nunarsuarmi moderniusumi aatsaat iluatsitsisinnaapput sallerpaatillugu tuluttut oqalussinnaagunik taamaattumillu atuartitsineq tuluttut ingerlanneqartariaqartoq ilaasa tunngavilersuutigisarpaat. Allalli isumaqarput meeqqat inunnguuseralugu oqaatsitik, Inuktitut - toqqammavigilluarunikkit ilinniarluarnerusinnaasut.
Inuit Tapirit Kanatami isumaqarput, Nunap inoqqaavinut inuusuttunut ilinniartitaaneq pitsaanerusoq pingarnersaasoq, taamaalillutik siunissami pitsaanerusunik atorfittaarlutillu iluatsitsinerusinnaammata.
Misissuinerni ersersinneqarsimavoq, maannakkut Nunavimmi atuartorpassuit iluameersumik tuluttoorsinnaanatillu Inuktitoorsinnaanngitsut tamannalu inuuniarnikkut ajornartorsiutinik suliffissaaleqinermillu kinguneqartarpoq. Inuit najugaqarfiini atuarfiit oqaatsit marluk atorlugit ilinniartitsisalernissaat 100 millionit koruuninik akeqartussatut eqqoriarneqarpoq.