Naggueqativut: Inuk pingaarutilik annaavarput

Jonathan Motzfeldtip toqukkut qimagunnera Canadami naggueqatigiit Inuit aamma attortissutigeqaat.

Canadami naggueqatitta suliniaqatigiiffiani, Inuit Tapiriit Kanadami, siulittaasoq, Mary Simon, KNR-imut oqarpoq, Jonathan Motzfeldtip toqukkut qimagunnera namminneq aamma aliasuutigigitsik. Tamanna pillugu naggueqatigiit Inuit sinnerlugit, Naalakkersuisut siulittaasuat, Kuupik Kleist, allakkanik nassissimallugu aamma oqarpoq.

Inuit Tapiriit Kanatami tusagassiuutinut nalunaarummi ima allapput: Issuaaneq aallartippoq:

"Inuit Tapiriit Kanadami ikinngutertik nuannarisartik asaqisartillu annaavaat. Jonathan Motzfeldt Kalaallit Nunaanni siuttuulluartuuvoq, siumut aqqutissiuussiuarluni. Namminersornerulerneq eqqunneqarmat Naalakkersuisut siulittaasoraat siulleq, naggueqatigiillu Inuit tamaasa neriullualersippai, neriunnerlu taanna namminersornerulerneq ilutigalugu alliartuinnaavissimavoq.

Kalaallit Nunaanni politikkikkut ineriartorneq Jonathan Motzfeldtip sulissutigiuarpaa, Issittumilu naggueqatigiinnut Inunnut tamanna nukittorsaataajuarsimavoq. Juuntaap politikkikkut sulinera soqutiginninneralu Inuit Issittormiut Siunnersuisoqatigiiffiata, ICC-p, ineriartorneranut aamma pingaaruteqarluinnarsimavoq. Inuk pingaarutilik aqqutissiuisorlu naggueqatigiit Inuit annaavaat", Inuit Tapiriit Kanatami allapput. Issuaaneq naavoq.

Nunavimmi naggueqatigiit suliniaqatigiiffianni, Makivik Corporationimi, præsidenti, Pita Aatami, oqarpoq:

"Angut maligassiuisoq, naggueqatigiit Inuit pisinnaatitaaffii pillugit ilungersuuteqartuartoq, Kalaallit Nunaata annaavaa. Maqaasinassaqaaq! Pita Aatami oqarpoq.

...

Marianne Stenbækip ilanngutassiaa taamaalilluta kalaallisuunngortipparput.