Naggueqativut Inuit arfivimmik pisaqarput
Nunavummiut arfivimmik pisaqarnissartik qangali utaqqisimavaat, arfivimmillu 14 meterinik takissusilimmik sapaatip-akunnerata siuliani pisaqartoqarpoq.
Oqaluttuarisaanermi pingaarutilimmik pisoqartoq, Iqaluit borgmesteriata Madeleine Redfernip CBC Newsimut oqaatigaa. Ukiummi 100-t kingulliit arfivimmik Iqaluit eqqaanni pisaqartoqarsimanngilaq.
Arfivik ulluni marlunni pilanneqareerpoq, sulili naammassinatik. Mattaat neqillu Nunavummi nunaqarfinnut illoqarfinnullu tamanut, Ottawamilu naggueqatigiit Inunnut nassiussuunneqarumaarput.
Uumasunik illersuiniaqatigiiffiit isornartorsiuinnginnissaat pillugu piniarneq tusagassiuutinit malinnaavigeqquneqanngilaq.
Naak arfivinnik piniartoqarnersinnaaneranik isornartorsiuisoqaraluartoq, Nunavummiut Canadami oqartussanit ukioq manna pingasunik arfivittassinneqarput. Issittup imartaani arfiviit 14.000-it missaanniissangatinneqartut Canadami oqartussat misissuineranni paasineqarpoq. Taamaammat pingasunik arfivittassiineq illersorneqarsinnaanerarpaat.
Piniartut 20-t piniaqataapput, inuusuttortaalli Luc Peter naaleqqaartuusimalluni.
Iqalunni innuttaasut sapaatip-akunnerata matuma ingerlanerani nuannattunnguupput, arfininngorpallu nerersuartitsisoqassaaq, allatigullu persuarsiortoqassalluni.
