Naggueqativut Haitimiunut katersuiniarput
Mary Simon Inuit Tapiriit Kanataami præsidentiusup oqaatigaa naggueqatigiit inuit aamma perlilerlutik ilungersunartorsiortarsimaqisut. Taamaammat Haitimi inuit atugaat eqqarsaatigimmatigit tupinnanngilaq.
- Uagut inuttut atugarliortarsimaqaagut, maannalu allanut ikiuunnissatsinnut piffissanngorpoq. Inuit Canadamiit taama oqariartuuteqarput.
Eva Ariak Nunavummi naalakkersuisuni siulittaasoq oqarpoq Canadami inuit ukiualuit matuma siorna Etiopiami perlilertunut ikiuussimasut, maannalu tassa Haiti ikiorneqartussanngorpoq.
Ulluni pingasuni kingullerni inuit kattuffii assigiinngitsut 500.000 kruuninik katersuisimapput ullullu tamaasa katersaat amerliartorput, aningaasallu nerisassanut nakorsaatinullu atorneqartussaapput.
Qanorli tamakku Haitimukaanneqassappat? Piita Atami tassunga ikiuutissaaq, taannalu Makivimmi Nunavimmiittumi præsidentiuvoq timmisartuutileqatigiiffimmillu First Airimik piginnittuulluni. First Airip timmisartuutaa annerpaaq atorneqarsinnaasoq Piita Atamip oqaatigaa, timmisartorlu nerisassanut nakorsaatinullu assartuinerinnarmut atorneqassanngilaq, annaassiniarnermulli tamarmut. Ikiuinissamut piffissanngortoq Piita Atamip oqaatigaa. Ikiuutissat ulluni qaninnerni nassiussorneqalissapput.
