Naggueqativut anersaakkut peqqinnerorusupput

Anersaakkut peqqinnerulernissap anguniarneqarnerani imminoortarnerup, persuttaasarnerup, ikiaroorniutinik atuisuunerup, sianiutiluutillu annikillisarnissaanut pitsaaliuutissanik aallartitsinissaq Inuit Tapiriit Kanata-meersut siunnersuutigaat. Iliuutsimmi taamaattut naggueqatitta akornanni imminut tatiginerulernerannik atugarissaarnerulernissaanillu kinguneqarsinnaanera taakkartorlugu.

Pilersaarut 'The Alianait Inuit Mental Wellness plan', naggueqatitta anersaakkut peqqinnerulernissaanik aallaaviusussaassaaq, tassaavorlu naalakkersuisut assigiinngitsut naggueqatittalu peqatigiillutik pilersitaat, ilaatigut Inuit Tapiriit Kanatameersut peqataaffigisaat.

Tassa Canadap avannaatungaani naggueqatitta najugaqarfiini tarnip pissusaanik ajornartorsiuteqarneq pissutigalugu ajornartorsiuterpassuit taamaalillutik annikillineqarnissaat pilersaarutip anguniarpaa.

Inuit Tapiriit Kanatami siulittaasup Mary Simonip, isumaa malillugu katsorsaaneq taakkunanngalu sullissisussanik inuttassaaleqinerujussuaq naggueqatitsinni ajornartorsiutaasoq, taamaattoqarneralumi amerlasuutigut kinguneqarnerluttaqaluni.

- Taamaattumik Canadami naggueqatitta nappaatinik suunerinik takunnissinnaasunik katsorsaaffiusinnaasunillu pisariaqartitsipput, taassumalu saniatigut naggueqatitta inooriaasaat piorsarsimassusiallu aallaavigalugit, ungasinnerusoq isigalugu, katsorsaasoqarsinnaalissallutik tapersersuisoqarsinnaalissallutillu. Taama Mary Simon oqaaseqarpoq.