Naggueqatitta oqaasii Nunavummi pisortatigoortumik oqaasiulerput
Inuinnaqtun Nunavup ilaani Qitirmiuni issittumilu kippasinnermi oqaaserineqarput, Inuktitullu Nunavup sinnerani atorneqarnerullutik.
Nunavummi tamarmi Inuktitut imaluunniit Inuinnaqtun atorneqalissapput, soorlu allakkerisarfinni pisortallu allaffiini. Taamaalilluni Inuktitut aamma Inuinnaqtun oqaatsitut ineriartortinneqalersinnaassapput. Inuktitut aamma Inuinnaqtun meeqqat atuarfianni, klassini soraarummeertussani allaat, ilinniartitsissutigineqartalissapput.
Oqaatsit pillugit ministerimik toqqaasoqassaaq inatsillu tamani atortinneqalernersoq taassuma nakkutigissavaa. Aamma oqaatsit pillugit allattoqarfimmik pilersitsisoqassaaq, The Inuit Language Authority. Taassuma oqaatsit nutaaliani tamani atorneqalernissaat siunertaralugu nutaaliorneq ineriartortissavaa. Maanna oqaatsinik internettimi katersaqareerpoq 80.000-it sinnerlugit oqaasertaqalereersumik, taakkulu tuluttut franskisullu nassuiaatitaqarput.
Ulluinnarni malunniutissaa unaassaaq, pilerisaarutit allagartallu inuktitut imaluunniit inuinnaqtun allanneqartassapput. Niuernermilli suliallit arlaqalereersut naammagittaalliorput akisuallaarnerarlugulu. Inuilli nalinginnarmik inooqataasut nuannaarput, taakkulu isumaqarput Inuktitut aamma Inuinnaqtun maanna nukittoriartuinnalissasut.