Naggueqatitta arnartaat aqutsisutut ilinniarsinnaanngorput
Malunnartitsiniarneq pivoq indianerit, metisit naggueqatigiillu inuit arnartaasa iluminni aqutsisunngorsinnaanerannut pilersaarut nutaaq ammarneqarmat.
- Oqaatsivut kulturerpullu uummarissaqqinniarpavut, kinaassuserput utertikkusupparput, siunissami aqutsisoorusuppugut, Mary Simon Inuit Tapiriit Kanatameersoq Ottawami ataasinngormat malunnartitsisoqarnerani taama oqarpoq.
Arnat aqutsisuunissaannut ilinniartitaanikkut pilersaarut nutaaq nunap immikkoortuani Nova Scotiami universitetimi St. Francis Xavierimi inissinneqarsimavoq.
Arnat Canadami nunap inoqqaavineersut namminneq nunaminni suliniaqatigiiffinnilu siunissami aqutsisunngornissaannut ilinniagartuutut aammalu sulinerminni tunulequtassaqartinnissaat pilersaarummi siunertarineqarpoq.
Pilersaarut nunap inoqqaavisa piumasaqaataannik tunngavillip aammalu indianerit, metisit inuillu innuttaasa akornanni pissutsinik tunngaveqartumik suliat pilersinneqarnissaannik misilinnertut isigineqarpoq. Tassani ilaatigut pineqarput najukkani ilinniartitaanikkut pissutsit, inuusuttunut paasisitsiniaanermik pilersaarutit nunaqarfinnilu peqqinnerulernissamik pilersaarutinik suliassat.
Malunnartitsiniarnermi Canadap generalguvernøria Michaelle Jean peqataavoq.
