Naggueqatitta akornanni tb atugaaqaaq

Naggueqatigiit inuit Canadami illoqarfinni nunaqarfinnilu najugallit amerliartuinnartut tuberkuloseqarput.

Canadami naggueqatigiit inuit akornanni tunillaassuuttumik nappaalasoqartorujussuuvoq isumaqartoqaraluarlunilu nappaat tuberkulose nungutinneqareersoq, ukiunili kingullerni qulini nappaat uteqqissimalluni. Napparsimasut amerlassusiat annilaanganarsiartorpoq.

Nappaatillit amerlavallaarput amerlanertigullu nappaat nappaatinik allanik ilakutaqartinneqartarluni, soorlu puatsigut nappaatinik.

Gail Turner Inuit Tapiriit Kanadamiittuni oqaaseqartartoq oqarpoq napparsimasut amerlavallaarnerat, pingaartumik nunami issittumi sumiffippassuarni ineqarniarnerup ajussusianik, pissuteqartoq.

- Amerlanertigut ilaqutariit tamavimmik inimi ataatsimi najugaqartarput. Illut oqorsarnerat pitsaasuuneq ajorpoq oqullu takussaasarluni, tassami illut Canadap kujasissortaani nuannaartorisat malillugit sananeqartarmata, aamaattorli Canadap issittortaanut qajannaatsuliaanatik, Gail Turner oqarpoq.

Taassuma ilanngullugu oqaatigaa nunaqarfinni amerlanerpaani nakorsamik ikiorneqarnissaq misissuinerillu pisariaqartinneqartut pineq ajortut.

- Uanga nammineq Nunatsiavumi najugaqarpunga, najukkannilu tarrarsortissinnaanngilanga Goose Bayimulli ingerlasariaqassallunga.

Canadami naggueqatigiit inuit peqqinnissakkut sullinneqarnerat ikiorsiivigeqqullugu, uit Tapiriit Tanatami Ministeriunermut Harperimut saaffiginnissuteqarput.

Canadap nunani siuarsarniakkani arnat meeqqallu peqqinnissakkut sullinneqarnerat pitsaanerulersinniaraa pillugu Harper oqaaseqarnikuuvoq.