Naggueqatigut pinngitsaalillugit nuutsinneqartut atuakkiarineqarput
Atuagaq nutaaq aviisimi New York Times-imi allaaserineqarpoq, tassani atuakkiortoq Melanie McGrath oqaluttuarpoq naggueqatigut Inuit Quebec-ip avannaani Ungava-mi 1953-imi pinngitsaalillugit 2000 kilometerinik avannarpasinnerusumut nuutinneqarsimasut, nuuffiallu tassa Ellesmere Islandip nalaaniittoq nunarsuarmi maniinakulunnerpaanut naggorlunnerpaanullu ilaasimavoq.
Taakku taama nuutitaanerat sakkutuut pilersaarusiornerannut attuumassuteqartinneqarpoq, taakkuli naggueqatitta piviusumik misigisimasaat imaannaasimanngeqisut atuakkami allaaserineqarpoq.
Nuuffiat piniagassaqarsimanngilaq imiinnarmillu narajuunngitsumik nassaassaqarpiarani aammalu najugatoqaanniit naleqqiullugu 30 gradenik nillernerusimaqaluni taamaalillunilu sakkortuumik anorlertarmat qaannamik piniarnissaq ajornakusoorsimaqaluni.
Ilaqutariit kaassimaqaat, neriorsorneqarnertillu naapertorlugu ukioq ataaseq qaangiummat najugatoqqaminnut Ungava-mut uteqqinniarsimagaluaramik itigartinneqarsimapput.
Ukiut arlallit qaangiummata aatsaat nuuffigisaat tassa Ellesmere Islandip nalaaniittoq inuuffigiuminakannersutut taaneqarsinnaalersimavoq, inooriaasiat pinngortitamut naleqqussarneqarsinnaalerluni.
1990-ikkut qeqqata missaani pinngitsaalisaallutik nuutitaaneranniit ukiut 40-t qaangiummata, Inuit naammagittaallioqqipput naammagittaalliutaallu nalilerneqarpoq: Canadap oqaluttuarisaanerani inuit pisinnaatitaaffii pitaannarlugit sakkortunerpaamik iliuuseqartoqarsimasoq.
Thule-miut nuutitaasimasut assigalugit Inuit Ellesmere Islandimiittut pisortatigoortumik utoqqatserfigineqarsimanngisaannartut atuakkiortup Melanie McGrathip atuakkiaani ateqartumi: The Long exile”-mi allaaserineqarpoq.
