Naggueqatigiit inuit pisortatigoortumik utoqqatserfigineqarput
Nunatsiaq Online ilaatigut ima allaaserisaqarpoq:
- Canadami naalakkersuisut Canadamilu innuttaasut tamaasa sinnerlugit ilaqutariit inuit Inukjuak-mi Mitsimatalimmi Aasuitsumi Qaasuitsumilu najugallit 1950-ikkunni nuutsitaasimanerat pillugu qamannga pisumik utoqqatserniarpugut, Canadami nunat inoqqaavinut ineriartortitsinermullu naalakkersuisortaaq John Duncan ullumi oqarpoq.
Ilaqutariit naggueqatigiit inunneersut katillugit 19-it Qaasuitsumut 1953-imi nuutsitaapput, Aasuitsumullu 1955-imi nuutsitaallutik. Pinngitsaalisaallutik nuutsitaasut suli maannamut inuusut nuutsitaasullu kinguaavi Canadami naalakkersuisuinit pisortatigoortumik ullumi utoqqatserfigineqarput.
Pinngitsaalisaallutik nuutsitaasimasut atugarliorsimanerannik qamannga pisumik misiginneqataavugut, Canadami naalakkersuisunut ilaasortaq John Duncan oqarpoq.
Ilaqutariit angerlarsimaffimminnit najugaqarfimminniillu peersitaapput,allamut ungasissorujussuarmut kilometerinik tuusintilinnik ungatsigisumut nuutsitaallutik.
Nuutsitaagamik najugassaanni illussaqartineqanngillat, inuussutissaqartinneqaratik pisariaqartitaannillu ikiorneqaratik, nuuffissaannilu pissutsit qanoq ittuunerannik paasitinneqaratik.
Naggueqatigiit inuit pinngitsaalisaallutik nuutsitaasut Canadami naalakkersuisunit taamani nuutsitaagamik neriorsorneqarput, kissaatigigunikku najugaqarfigisatoqqaminnut uteqqissinnaasut, neriorsuulli tamanna Canadami naalakkersuisunit malinneqarsimanngilaq, John Duncan utoqqatserluni oqalugiarnermini ullumi pisumi tamanna erseqqissarpaa.
Canadami naalakkersuisut naggueqatigiinnut inunnut utoqqatsernerat, illoqarfimmi Inukjuak-mi atuarfimmi Innalimi ullumi pivoq. Naggueqatigiit inuit pinngitsaalisaallutik nuutsitaasut Inukjuarmit pisuupput.
Canadami naalakkersuisut utoqqatsermata Canadami inuit sinnissaat najupput, Canadami inuit præsidentiat Inuit Taperiit Kanatami siulittaasoq Mary Simon, suliniaqatigiiffiup Makivik Corporationip præsidentia Pita Aatami aamma Nunavut Tunngaviup præsidentia Paul Kaludjak.
