Naggueqatigiit Inuit peqqissusaat iliuuseqarfigineqalerpoq
Canadami peqqinnissamut ministerip, Leona Aglukkaqip, Canadami naalakkersuisut sinnerlugit Inuit Tapiriit Kanadamut ukiuni marlunni isumaqatigiissut atsiorpaa.
Isumaqatigiissut isumaqatigiissummut maanna atuuttumut uiggiutaavoq, tassa naggueqatigiit Inuit peqqinnerulernisssaat eqqarsaatigineqarluni. Peqqinnissamut ministeri, Leona Aglukkaq, nammineq naggueqatigiiuvoq Inuk, taannalu oqarpoq, naggueqatigiit Inuit peqqissusaasa ajornartorsiutigineqarnerat inissiat ajornerujussuinik aamma suliffissaaleqisoqarnerujussua pissutaaqataasut.
Aamma oqarpoq nakorsat peqqissaasullu ikippallaarujussuartut, aamma nunaqafiit ilaat ataasinnguamilluunniit peqqissaasoqanngitsut. Tamanna naalliunnarnerarpaa, neriuutigaalu peqqinnissaqarfimmi sulisut amerlissasut, aammagooq nakorsat peqqissaasullu siunissami tassaasinnaapput naggueqatigii Inuit.
Inuit Tapriit Kanadami siulittaasoq, Mary Simon, naggueqatigiit Inuit sinnerlugit isumaqatigiissummik atsiortuuvoq. Mary Simon oqarpoq, tarnip pissusiinik ilisimasallit, siunnersortit allallu amigaatigineqaqisut. Peqqinnissaqarfimmi sulisut amerlinissaat Mary Simonip kissaatigeqaa, tassami naggueqatigiit Inuit imminut toquttarnerat annertuallaaqaaq, tuberkuloseqartarnerlu aallarteqqissimasoq aamma eqqaavaa, tamannalu unitsinniarneqartariaqartoq oqarluni.
Peqqinnissamut ministeri naggataagut oqarpoq Canadami naalakkersuisut peqqinnissaqarfimmut ukiuni tulliuttuni marlunni 1½ milliardi koruuninik immikkut aningaasaliissasut.
