Naggueqatigiit inuit nerisaat peqqinnarluinnarput
Ileqquusumik nerisarineqartartut arlalitsigut peqqinnarsimaqisut Canadap avannaani misissuinermit paasineqarsimavoq.
Misissuinermilu paasisat naapertorlugit ileqquusumik nerisat uummallunnermut kræftimullu pinaveersimatitsisarsimapput.
- Naggueqatigiit Inuit nerisaat sukkumik akoqanngivillutik orsoqarluarlutik inuussutissaqarluarput, taama nakorsaq misissuinermi peqataasoq Erik Dewailly oqarpoq.
Taanna erseqqissaavoq nerisassat taamaattut peqqinnangaaramik inuup timaanut naleqqutingaaramik naleqquteriaqqiffissaqanngitsut.
Aviisillu allap allaaserisaani atuagaq iganermut ilitsersuut nutaaq nunap inoqqaavisa nerisaannut naleqqusagaaniartussaagaluaq naggueqatigiinnut inunnut Canadamiittunut atorsinnaanngitsuunerarlugu isornartorsiorneqarsimavoq.
Tassamigooq ileqquusumik immikkut ittumik nerisaqartoqartarnera eqqarsaatiginngiivillugu iganermut ilitsersuut atuagaq suliarineqarsimavoq, naak nunap inoqqaavisa nerisaannut naleqqussagaaniartussaagaluartoq. Allaaserinnittullu isornartorsiutaa malillugu atuagaq taanna illoqarfissuarmi najugalinnut naleqqunnerussangatinneqarpoq.
