Naggueqatigiit inuit naleqartitaat malillugit pinnguaat nutaaq
Pinnguaatini soorlu Ludomi Matadorimilu unammeqatigisaq ajugaaffiginiarneqartarpoq. Thomassie Mangiok-qili naggueqatigiit inuit naleqartitaannik pinnguaatiliorniarpoq tassalu akerariinnginniarluni suleqatigiinnertalimmik, Thomassie Mangiok aviisimut The Gazettemut taama oqarpoq.
Thomassie Mangiok Nunavimmeersuuvoq. Taassuma naleqartitagut atorlugit pinnguaat nutaaq ukiuni marlunni suliarai.
Pinnguaat Nunami-mik taaguuteqarpoq, isumalluutillu tamanut iluaqutaasussat pissarsiarisat ingerlannissaannut tunngavoq.
Thomassiep pinnguaatip sannaata ineriartortitassap aallaqqaataa sanareerpaa maannalu internetti aqqutigalugu aningaasanik pissarsiorpoq taamaalilluni pinnguaat Nunavimmi immaqalu Canadami tamarmi tunisaalersinnaassalluni.
Thomassie Mangiop issittumi nunat pinnguaammi peqataatinniarsimallugit Gazettemut oqaatigaa. Pinnguaat naggueqatigiit naleqartitaannut piorsarsimassusaannullu tunngavoq ilaqutariinnilli tamanit pinnguarilluarneqarsinnaasoq oqaatigaa.
