Naggueqatigiit Inuit illersornissamut sulinermi akuunerulertariaqarput
Nalunaarusiaq nutaaq, ataatsimiititaliamut saqqummiunneqartoq, Canadami naalakkersuisuni partiinit sisamanit tamanit taperserneqarpoq. Tassani ilaatigut allassimavoq Canadami nunap inuii Issittumi illersornissamut akisussaaffeqarnerusariaqartut.
Inatsisartunulli ilaasortaq, Jack Harris, nalunaarusiamik suleqataasoq, nutaarsiassaqartitsivimmut Canwestimut oqarpoq, naggueqatigiit Inuit ukiuni tusindtilippassuarni tamaani najugaqarsimanerat atorluaannarnagu, najukkaminni peqqissumik atasinnaasumillu ineriartortitsinissaannut tapersersortariaqarivut.
Inatsisartunut ilaasortat illersornissamut ataatsimiititaliamut oqaaseqaamminni aamma oqarput, Issittumi Siunnersuisoqatigiit nukittorsarneqarnissaat pisariaqartoq, taamaalilluni sunniuteqarnerulissammat; Canadap aallartittaqartarnera aallarteqqittariaqarpoq, nunanimi Issittuni suleqatigiinneq pingaaruteqaraluttuinnarpoq, Inatsisartunut ilaasortat siunnersuipput, tassami Issittumi pissutsit pillugit pilersitsisoqarnissaq pillugu naalakkersuisuni ataatsimiitaliortoqartariaqartoq taakku isumaqarput.
Illersornissamut ataatsimiititaliaq isumaqarpoq siunnersuutigalugulu Canadami nunap inuii Canadami naalakkersuisunit salliutinneqartariaqartut. Illoqarfinni nunaqarfinnilu naggueqatigiit Inuit ineriartortinneqartariaqarput, ataavarnissaallu sulissutigisariaqarluni, Canadamimi namminersortuunerup aalajangersarneqarnissaani suleqataanissaat pisariaqarluinnarmat, ataatsimiititaliaq isummersorpoq. Issittumi avatangiisit pillugit ilisimatusarnermi siunissami suliniutissani naggueqatigiit Inuit aamma ilanngunneqartariaqartut ataatsimiititaliap siunnersuutigaa.
Canadami ilanngutassiortutta Marianne Stenbækip, ICC-ip ataatsimeersuarnissaanut atatillugu maanna Nuummiittup, ilanngutassiaa taamaalillugu kalaallisuunngortipparput.
