Naggueqatigiit Inuit: COP15-imi isumaqatigiissutip ilaata Issittumut tunngassuteqarsimasariaqaraluarpoq

Cop 15-ip naajartulernerani isumaqatigiissutissallu ilusilersornerani oqaasertaasa ilaat issittumut tunngassuteqarnissaat, ilami siku apullu oqaaseqaatiliamut ilaatinneqarnissaat canadamiut aallartitaasa pingaartissimagaluaqaat, allaammi Canadap Danmarkimut aallartitaqarfiani ambassadøriusoq Peter Lundyp aput sikulu isumaqatigiissusiami ilaatinneqarnissaa qularutigisimanngikkaluarpaa. Kisiannili taamaasiortoqarsimanngilaq.

Cop 15-ertoqarnerata nalaani issittup nunartai ussatigineqarsimaqaat, ilami pingasoriarluni ICC-p aaqqissugaanik ornigarneqarluaqisumillu pisoqartarsimavoq, oqaluttuarisaanermilu siullerpaamik nunat tamat ataatsimeersuarneranni issittumi naalakkersuisunut siulittaasut pingasut ataatsikkut najuussimallutik tassaasut Eva Aareak Nunavumeersoq, Floyd Roland North West Territories-imeersoq, kiisalu Kuupik Kleisti.

Issittumilu nunat ussatigineqarsimaqimmata isumaqatigiissutissap oqaasertaani siku apullu taputartuunneqarnissaat Canadamiut aallartitaasa ilungersuutigisimagaluarpaat, iluatsinnaguli.

Mary Simon tusagassiortunik katersuutsitsimmat pakatsisimanerarluni oqarpoq, kisiannili siuariartoqarsimanissaa aamma neriuutiginerarpaa, siunissamilu isumaqatigiinniartoqalerpat atsiortoqassappallu issittup nunartaasa ilanngunneqarnissaat maanna neriunaateqarnerulersinnaasoq aamma oqaatigaa. Massakkummi isumaqatigiissutaagallartumi 2 gradiinnarnilluunniit sila kiatsinnerussagaluarpat issittumi sila kiannerujussuanngussaaq, tamaanilu innuttaasut eqqungaasussarujussuummata aningaasatigut ikiorserneqarnissaat pisariaqalissaaq, massakkullumi Canadamiut issittumut aningaasanik ikiorsiissutissiinissaat pisariaqalerpoq, Mary Simon oqarpoq.

Marianne Stenbækip Canadamiit ilanngutassiaa Knud Reimerimit kalaallisuunngortinneqarpoq.