Naggueqatigiit ingerlatsiviat nalliuttorsiutigineqarpoq

Makivik iluanaarniutaanngitsumik ingerlatsiviuvoq Nunavimmi aningaasaqarnikkut, piorsarsimassutsikkut politikkikkullu ineriartornermik nakkutiginnittoq.

Quebecip avannaani nuna naalakkersuisunut tunniunnerani aningaasat naggueqatigiinnut Inunnut taarsiissutigineqartut aqunneqarnissaat siunertaralugu Makivik pilersinneqarpoq.

Makivik Canadami nunap inoqqaavinut iluatsilluarsimasutut maligassatut ukiuni 35-ni ineriartorsimavoq.

Makiviup suliarisimasai assigiinngitsut iluatsilluartumik ingerlasimapput. Ingerlatsivik ilaatigut marlunnik timmisartortitseqatigiiffeqarpoq, First Air aamma Air Inuit, 1000-it sinnerlugit sulisulinnik.

Makivilli timmisartortitseqatigiiffeqaannanngilaq, ingerlatsivik aamma sanaartortitsivimmik, Nunavimmi illunik, timmisartoqarfinnik atuarfinnillu amerlanernik sanaartortumik, ingerlatsivoq.

Taamatuttaaq aalisarnermik suliffeqarfimmik, umiarsuarmik angalaartitsivimmik, mersortarfinnik, ukiorsiutinik immikkuullarittunik tusaamaneqaleraluttuinnartunillu sanasartunik, lastbiiliuteqatigiiffimmik allarpassuarnillu aamma ingerlatsiviulluni.

Makivik, maanna Piita Aatamimit Kuujjuarmeersumit aqunneqarpoq. Atuarfiit pitsaanerit ilinniarfiillu aqqutigalugit, peqqissutsimut kiffartuussinermik pitsaanermik pilersitsinermi, ukiumullu marloriarluni akikitsunnguamik timmisartukkut angalatitsinermik, nunavimmiut inuunerannik pitsanngorsaasussatut ingerlanneqarluni.

Makiviup Nunavimmiut inuunerannik pitsanngorsaanermini suliarisimasaasa tamakku ilaannaraat, kulturimik oqaatsillu attatiinnarneqarnissaanik aamma sulissutiginnippoq.

Nalliuttorsiorneq Quebecip ministerianit naalakkersuisunillu ilaasortanit allanit ilaaffigineqartumik, aqagu malunnartinneqassaaq.