Naggueqaterput Canadami immaqa generalguvernørinngussaaq

Canadami ilanngutassiortorput Mariane Stenbæk ima paasissutissiivoq:

- Canadami pisortatigoortumik qullersaq, aap, Dronning Elisabethip sinniisaa, tassaavoq guvernøri - generaali. Canadami generalguvernørip inatsisit atsiortarpai inatsisissatullu siunnersuutinik itigartitsisinnaagaluarluni, tamannali pisimanngisaannarluni. Taanna arnaaguni angutaaguniluunniit naalagaaffimmi pisartuni tamani naalagaaffimmilu pisortat nunanit allanit Canadamut tikeraarneranni Canadamut sinniisuuvoq.

Mary Simon, Inuit Tapiriit Kanadami-mi præsidentiusoq nutaamik generalguvernøritut piukkussat marluk aapparissagaat tusatsiakkamik, aviisi The National Post sapaatip akunnerani kingullermi saqqummiussaqarpoq. Taamanikkulli tamanna tusatsiaannagaajunnaarpoq annertuumilli oqallisineqalerluni Mary Simon aatsaat siullermeerutaalluni taannaajumaarnersoq, tassani atorfimmi pingaarutilissuarmi naggueqatigiinni inunni indiaaneriniluunniit generalguvernøritut atorfilik siulleq. Siornatigummi inuit indianerillu taama atorfeqarsimanngimmata.

Amerlaqisulli oqarput Canadami atorfiup qaffasinnerpaap naggueqatitsinnik inummik indiaanermilluunniit inuttalerneqarnissaa piffissanngortoq.