Naatsorsuutit 2004-moortut uparuagassartallit
Landskarsip naatsorsuutai tamaasa atuassallugit oqimaakulussinnaavoq, ullumi inatsisartut kukkunersiuisussatut ataatsimiititaliaat 2004-moortunik naatsorsuutinik quppernernik 85-nik quppernilinnik nassiussipput. Naatsorsuutillu taakku kingorna inatsisartuni misissorneqaqqissapput akuerineqarniartussaassallutillu.
Qulaaniit oqartoqarsinnaagunaraluarpoq naatsorsuutit akuerineqarsinnaasut, -kisiannili naatsorsuutit uparuagassaqaaloqisut erseqqissaatigineqarpoq.
Ilaatigut mikisuarsuit ulluinnarni aningaasartuutaasarsimasut naatsorsuusiornermut ilaatinneqarsimapput, aammattaarlu pinartunik tikkuarneqartarialinnillu atuisoqarsimallunissaaq.
Assersuutigalugu konto ilassinnissutinut atugassiaq aamma atorneqartarsimavoq.
Soorluttaaq naluneqanngitsoq konto taanna siornatigut taamatut atorneqartarpoq tamatumalu politiinit maanna misissorneqarnera maannakkuugallartoq kukkunersiunermik ataatsimiititalianit oqaaseqarfigineqarusunngilaq.
Nalunaarusiap qupperniisa siulliit ilaanni naalakkersuisut siulittaasuata Hans Enoksenip ineqarnermut naalakkersuisuusimasumut akeqanngitsumik inimik atukkiussisimanera uparuartuutigineqarpoq. – Kukkunerlu taanna naalakkersuisut allattoqarfiata kukkunerimmagu
naalakkersuisut siulittaasuata akisussaaffigissagaa, kukkunersiuisut allapput.
