Naatsorsueqqissaartarfik suleqatigiinnissamik ujartuivoq

- Oqartussanit nalunaarutigineqartut tunngavigalugit kisitsisit saqqummiuttarpavut, Søren Christian Bjulf Kalaallit Nunaata Naatsorsueqqissaartarfianiit taama oqarpoq.

- Imaassinnaavoq naatsorsueqqissaarnitsinni inernerit eqqortumik takutitseqqissaartuunngitsut, uatsinnulli nassiunneqartut kisiisa tunngavigalugit suliagut suliarisinnavagut, Søren Christian Bjulf oqarpoq.

Taanna Kalaallit Nunaata Naatsorsueqqissaartarfiani immikkut siunersortaavoq. Taassuma nassuerutigaa, kisitsisit atorneqartut nalorninarsinnaasut, oqarlunili kisitsisit atukkatik tamarmik misissoqqissaartarlugit.

Kalaallit Nunaata Naatsorsueqqissaartarfianiit kisitsisit saqqummiunneqartut Politimestereqarfimmiit Eqqartuussivimmiillu ippassaq isornartorsiorneqarput. Kisitsisit atorneqartut nalorninartoqarsinnaammata tutsuiginassusaat apeqquserneqarsinnaasoq isornartorsiuinermi oqaatigineqarpoq.

- Naatsorsueqqissaartarfiup kisitsisaatai sunik tunngaveqarnersut ilisimanngilara, eqqartuussinerimmi qassiunersut tunngavigineq ajorpavut, pinerluttuliortoqarsimaneranilli nalunaarutiginninnerit tunngavigisarlutigit, politimesterip tullersortaa Morten Nielsen ilaatigut taama oqarpoq.

Pinerluttuliornerit ikiliartornersut eqqartuussinissalli piffissalerneqarnissaannut aalajangiinerit ikiliartornersut ilisimaginagu Morten Nielsen oqarpoq.

Eqqartuussivimmiit aamma oqarput, kisitsisit atorneqartut atorfissaqanngitsut.

- Eqqartuussisutigummi suliakkiissutigineqartut aalajangiiffigineqartullu qassiunersut kisitsisaataatiginngilagut, qassillu aalajangiiffigineqartussaasut aamma kisitsisaatiginatigit, Nunatta Eqqartuussiviani eqqartuussisoq Thomas Trier Hansen oqarpoq.

Taamanna naatsorsueqqissaartarfimmi siunersortip ima oqaaseqarfigaa.

- Kisitsisit saqqummiussavut tamarmik oqartussanit susassaqartuneersuusarput.

Pisimasut tamaasa nalunaarutigisimanngippatigit ilisimasinnaanngilarput, tassami paasissutissat tamaasa pisimanerlugit nalusarparput, Søren Christian Bjulf taama oqarpoq nangillunilu:

- Kisitsisit saqqummiussassanngorlugit uagutsinnut tunniunneqartut isornartussarsiortarpagut. Kisitsisinngolugit paasissutissat pitsaanerpaat takutinniartarpagut, ilaatigulli pitsaanerpaanik atugaqartitaaneq ajorpugut.

Søren Christian Bjulfip pisortanik suleqateqarluarnerunissaq ujartorpaa. Atortunik nutaaliaasunik attaveqaqatigiinnerup atorneqarsinnaanissaa siunersuutigaa, suleqatigiinnermut ikiuutaalluarsinnaammat.

- Kalaallit Nunaanni Naatsorsueqqissaartarfik suleqatiginninnissamut kissaateqarpoq. Allakkatigut pappialatigullu suleqatigiinneq qimakkiartorneqarsinnaasuuppat, paasissutissanillu qaraasiatigut avitseqatigiinnermik tunngaveqartumik suleqatigiilerutta siuariaassaqaagut.

Kalaallit Nunaanni naatsorsueqqissaartarfimmi siunersorti Søren Christian Bjulf taama oqarpoq.