Naatitsisartut akinik qaffaarusuttut

Neqi kiilumut 10 koruuneqartitsinissaminut neqeroorpoq. Naatitsisartulli kiilumut 13 koruuninik piumasaqarput.

Naatsiiat Neqi A/S-imut tunineqarneranni kiilumut 10 koruuneqartitsinissamik Neqi A/S-ip neqeroorutaa naatitsisartut akueriumanngilaat.

- Massakkumut aporfiusoq unaavoq naatitsisartut, imaluunniit kartoffilinik tunisaqartussat annikigigamikku. Tassa taanna aallaavigalugu akinut tunngasut suli isumaqatigiissuteqartoqanngilaq.

Savaatillit peqatigiit suleqatigiissut SPS Siulittaasuat Otto Nielsen oqarpoq.

Siorna kiilumut 11 koruuneqartitsisoqarpoq. Ukioq mannalu kiilumut 9 koruuneqartitsisoqassasoq Neqi A/S-ip siullermik piumasarisimagaluarpaa, massakkullu kiilumut 10 koruuni killiffiuvoq.

Naatitsisartut kiilumut 13 koruuneqartitsinissamik suli piumasaqarput.

AAMMA ATUARUK Savaatillit aningaasatigut ikiorserneqarnissaminnik suli utaqqipput

Kiilumulli qanoq akeqartitsinissaq suli isumaqatigiissutigineqanngikkaluartoq naatsiiat ukioq manna naatitat Neqi A/S-imut assartorneqalereersimapput.

- Isumaqarpunga pingaarnerpaasoq tunineqarsinnaangornerat massakkut qulakkeerneqarmata. Taava aki pissutaaginnarluni ajornartorsiummik pilersoqannginnissaa uanninngaaniit kissaatiginarpoq, Otto Nielsen oqarpoq.

Kiilumulli qanoq akeqartitsisoqarnissaannik Neqi A/S-ip naatsitsiartullu piumasaqaataasa nikingassutaat suli tassa 3 koruuniuvoq.

Akinullu tunngasut sapinngisamik piaartumik isumaqatigiissutigineqassasut SPS-ip siulittaasuata neriuutigaa

- Tassa naatsorsuutigaarput ulluni qaninnerpaani akinut tunngasoq paaseqatigiiffiussasoq. Taava akigitinneqartussaq naqissuserneqarniassammat, Otto Nielsen oqarpoq.

Neqi-p pisortaa kiilumut akinut isumaqatigiinniarnerit pillugit oqaaseqartinniaraluarparput, angalammalli tamanna iluatsissinnaanagu.