Savaatillit aningaasatigut ikiorserneqarnissaminnik suli utaqqipput
- Kujataani panernersuaqarnera soorunami annertuumik savaatilinnut sunniuteqassaaq, tassami ukiorloriarluni aasaq manna panernersuaqarpoq.
Savaatillit Peqatigiit siulittaasuat, Frederik Frederiksen oqarpoq.
Nerukkaatissanik pisiniarnissaq savaatilinnit tunuarsimaarfigineqarpoq.
Savaatillit aningaasatigut ajornartorsiornerisa kingunerannik nerukkaatissanik immikkut pisiniarnissaq savaatilinnit tunuarfigisimaarneqarpoq. Tamannalu pissutigalugu, Savaatillit Peqatigiit siunnersortertik peqatigalugu, Aalisarnermut, Piniarnermut Nunalerinermullu Qullersaqarfimmut aningaasanik tapiisinnaanermik misissuisoqarnissaanik sapaatip akunnerani kingullermi kajumissaaripput.
Namminersorlutik Oqartussat nunalerinermut siunnersortaat, Aqqalukasik Kanuthsen KNR-imut ullumi oqarpoq, aningaasanik tapiisinnaanermut tunngatillugu tamanna suli oqartussanit aalajangiiffigineqanngitsoq.
Kisiannili KNR-ip paasisai naapertorlugit tamanna tallimanngorpat septembarip sisamaani aatsaat aalajangiiffigineqartussaaq.
Aningaasaliisoqarnissaalu savaatilinnit neriuutigineqarpoq.
- Tassa aningaasaliisoqarnissaa suli nieruutigaarput kisiannili tamanna pillugu suli ersarissumik paasisaqanngilagut - kisianni tassa neriuuteqarpugut suli, Frederik Frederiksen oqarpoq.
Karl Kristian Krusep ilimagaa tapiisoqarumaartoq.
Aalisarnermut, Piniarnermut Nunalerinermullu Naalakkersuisoq, Karl Kristian Kruse Qanoruumut tallimanngormat oqarpoq, ilimagalugu savaatillit aningaasaliisoqarnissaanik qinnuteqaataat akuerineqarumaartoq.
Savaatillit Peqatigiit siulittaasuata erseqqissarpaa, Kujataani siallilissagaluarpalluunniit nerukkaatissiornissaq maanna kingusinaareermat.
- Tamanna savaateqarnissinnut qanoq kinguneqassava?
- Tassa maanna kinguneqarnerluttoq takusinnaalereerparput. Tassami savaaqqat panernersuaqarnerata kinguneranik ukioq manna oqinnerussasut naatsorsuutigisinnaagatsigu. Savaaqqallu oqippallaarpata soorunami tamanna aningaasatigut killormut malunniuttussaavoq.
Savaatillit Peqatigiit siulittaasuat, Frederik Frederiksen taama oqarpoq.
Kujataani savaatillit 40 missaanniittut panernersuaqarnera pissutigalugu nerukkaatissanik naammattunik pissarsiniarnissamik ajornartorsiuteqarput.
