Naatitat Tysklandimeersut Pisiffimmi tuniniarneqarunnaarput
Pisiffiup icebjerg salaatit Tysklandimeersut e-colimik bakteriaqanngitsutut nalilerneqaraluit tuniniarusunngilai.
- Sillimarusukkatta tuniniarusunngilagut, Pisiffiup pisortaanera Per Steen Larsen oqarpoq.
- Tomatit, agurkillu pineqartut nioqqutiginikuunngiivippagut, tuniniakkagullu ajoquteqaratik. Icebergsalaatilli Tysklandimit tikisitagut niuertarfinni tuninianngitsuuinnarpagut, Per Steen Larsen oqarpoq.
Nunatsinni uumasut nakorsaanerata, Mads Thor Madsenip agurkit, tomaatit salaatillu sillimaffigineqartariallit pillugit niuertut tamaasa attavigereerpai.
- Taakkuninnga nioqquteqaqqunangit niuertut piumaffigaakka, Mads Thor Madsen oqarpoq nassuiaallunilu nunatsinni atuisartut ernummatissaqanngitsut.
- Nerisassanut pineqartunut tunngatillugu aarlerisoqassappat, taava taakkuninnga eqqaanissaat siunnersuutigissavara. Imaluunniit tomatit uunneqarlutik nerineqarsinnaapput. Aamma apeqqutissaqartoqarpat niuertut imaluunniit uagut attavigineqarsinnaavugut, Mads Thor Madsen nassuiaavoq.
Pisiffiup Danmarkimi fødevarestyrelsep siunnersuutaai naapertorniarpai. Agurket, tomatit salaatillu e-colimik bakteriiallit aamma tuniniarusunngilai. Salaatit Tysklandimeersut bakteriaqanngitsutut nalilerneqartut Pisiffimmit tuniniarneqanngillat, allalli nutaat tikisinneqalerput.
- Sapaatip akunnerani matumani tikisinneqartussat Tysklandemeersuunatik nunanit allaneersuupput, Per Steen Larsen oqarpoq.