Naatitat tunisassiassatut

Kalaallit Nunaanni naatsiiat naatinneqartartut siunissami nunani allani tuniniarneqarsinnaanissaat piviusunngorsinnaalerpoq.

Kalaallit Nunaanni naatitanik tunisassiassanik nakkutilliisinnaasumik pilersitsiniarnermi Danmarkimi natitat pillugit pisortaqarfik ikuukkumavoq. Danmarkimi inuussutissaqarnermut ministeri Hans Chr. Schmidt ima oqarpoq:

- Kalaallit Nunaannut pingaaruteqarpoq, naatitanik tunisassiaasunik uppernassuseqarnerusumik nakkutiginnissinnaasumik peqarnissaq. Nunanullu allanut tunisassiorniarunik, Kalaallit Nunaat piumassappat, ikiuussinnaavugut.

Naatitanik tunisassiorniarnermi uppernassusilimmik nakkutiginnissinnaaneq pillugu misilittakkatsinnik tunniussisinnaavugut, Kalaallit Nunaanniit naatitat tunisassiarineqarsinnaaneri soqutiginarmata, Hans Chr. Schmidt, oqarpoq.

Kalaallit Nunaat Savalimmiullu Naalagaaffeqatigiinnermut ilaagaluartut, EU-p iluani ilaasortaanermi nunat pingajuattut Nunarput Savalimmiullu taaneqartarput, taamaammallu Naatitat Kalaallit Nunaanneersut nunanut allanut Danmark aqqutigalugu tuniniaasinnaanera inerteqqutaavoq. Aatsaat naatitat napaalassutaasinnaannginneranik uppernaasaataasumik immikkut akuersissummik peqaraanni, nunanut allanut tuninaasinnaaneq piviusunngorsinnaavoq.

Naatitat pillugit nakkutilliisinnaasumik, Kalaallit Nunaanni peqalernissaq pisariaqarpoq, nunanut allanut naatitanik tuniniaasalerniaraanni.

- Taamaammat naatitat pillugit pisortaqarfik piumaffigisimavara, Kalaallit nunaanni Inuussutissarsiornermut Nunalerinermullu Naalakkersuisoqarfik attaveqarfigineqarnissaa. Suleqatigiikkutta Kalaallit Nunaanniit nunanut allanut naatitanik tunisassiulerinnaaneq aqqutissiuunneqarsinnaalissammat, Danmarkimi inuussutissaqarnermut ministeri Hans Chr. Schmidt oqarpoq.

Inuussutissalerinermut nunalerinermullu naalakkersuisup Johan Lund Olsen-ip saaffiginnissuteqarsimanera aallaavigalugu, Danmarkimi inuussutissaqarnermut ministeri Hans Chr. Schmidt suliniuteqalersimanerarpoq.