Naatitat nutaat, containerimi naatitat

Naatitanik nutaanik, containerimi naatitanik, imminut pilersorsinnaavugut. Agurkit, tomatit broccolillu unammillersinnaasunik akeqartillugit tuniniarsinnaavagut.

Tassa aallarnisaasunik unammisitsinermi Startup Greenlandimi, Nuummi tallimanngornermit sapaammut ingerlanneqartumi, ajugaasup najoqqutassiassatut saqqummiussai. Aallarnisaasut 30-init amerlanerusut  siunnersortinut naliliisartunullu isumassarsiaminnik saqqummiussipput.

Pierre Minik Lynge ajugaasuuvoq, isumassarsiaalu piviusunngortussanngulereerpoq.

Davis Strædep illuatungaani containerini iluatsitsiffiulluartumik naatitsisoqartarnera isumassarsiorfigisimavaa.

- Nunatsinni aamma taamaaliortoqarsinnaavoq. Bananinilli naatitsisoqarnavianngilaq, Pierre Minik Lynge KNR.gl-imut oqarpoq.

Pinnattaani 10.000 koruunit, atortorissaarutinut nutaanut atorniarpai takorluukkamilu piviusunngortinniarnissaanut piareersarluni.

- Jordbærinik, broccolinik, agurkinik tomatinillu naatsitsissaanga. Naalluarseeqqaalaassavakka. Katersorseerukkillu, aatsaat pimoorussamik aallartissaanga, Pierre Minik Lynge oqarpoq.

Maannakkorpiaq qanoq akeqarnissaannut tigussaasunik isumassarsiaqanngilaq, naatitalli nammineq naatitat akit unammillersinnaasut atorlugit tuniniarneqarsinnaanissaat qularutiginngilaa.

- Naatitat niuertarfinni pisiarisartakkagut sivisuumik assartorneqartarneri eqqarsaatigineqartariarpoq, assartornerimi uagut akilertarparput. Naatitat asiuinnartut eqqaannarnarneqartullu amerlasuupilussuupput. Taakku aamma uagut akilertarpagut, Pierre Minik Lynge oqarpoq.

- Containerini naatitanik naatitsisinnaaneq sinerissami sumiiffinni allani aamma atorneqakutsoorsinnaavoq, Pierre Minik Lynge oqarpoq.

Amerikamiut suliffeqarfiat Freight Farms, sumiiffinni naatitanik nalinginnaasumik naatitsiffiusinnaanngitsuni periutsimik tamatumunnga atuisoq, ilaatigut isumassarsiorfigisimavaa.

Unammisitsineq Startup Greenland iluatsitsiffiulluarpoq Niuernermik Ilinniarfimmilu aaqqissuisuit aappagu unammisitseqqinniarlutik maanna eqqarsaatigilereerpaat.

- Suliffeqarfinnit aningaasaliissutinik pissarsisinnaassagutta, Startup Greenland aappaagu ingerlateqqikkusupparput. Aningaasaliisuvummi ilaatigut peqqutaallutik sapaatip akunnerata naanerani unammisitsineq ingerlassinnaasimavarput, Lars Møller Kranker, Niuernermik Ilinniarfimmeersoq KNR.gl-imut oqarpoq.