Naatitanit ikummatissiat nerisassanut akitsorsaataapput
Tuluit Nunaanni aviisimi ullormut saqqummersartumi The Guardianimi ullumikkut taama allaaserinnittoqarpoq, aningaaserivissuup Verdensbankenip nalunaarusiaa avammut saqqummiunneqanngitsoq innersuussutigalugu.
Naatitanik ikummateqarnermik illersuisut oqaatigaat, tamanna uuliamik ikummateqarnermit mingutsitsinnginnerusoq, CO2-mik aniatitsinermik minnerulersitsisinnaasoq nunarsuullu kiatsikkiartorneranik killilersimaarinnittuusoq.
Aningaaserivissuup Verdensbankip nalunaarusiaa apriilimili naammassineqarpoq, aviisimili The Guardianimi oqaatigineqarpoq, USA ajornartoortikkumanagu nalunaarusiaq avammut saqqummiunneqanngitsoq.
Tassami USA isumaqarpoq, naatitanit ikummatissiorneq nerisassat 3 procentiinnarmik akisunerulernerannik kinguneqartoq. USA-p præsidentia George W. Bush oqarpoq, nerisassat akisunerulernerannut Indiap Kinallu nerisassanik pisinerusalernerat patsisaasoq.