Naasut takinerulermata kiannerulertoq

Nunarsuup kianneruleriartornera Issittumi kiannerulersitsivoq. Kianneruneralu issittumi qeriuaannartup masarsuini naasut takinerulernerannik kinguneqarpoq.

Issittumi naasut pillugit misissuinerit maannamut annersaanni, ilisimatuunut atuagassiami Naturemi saqqummiunneqaqqammersumi taama inerniliineqarpoq.

- Ukiut 30-t kingulliit ingerlaneranni kianneruleriartortoq naasullu agguaqatigiissillugu takinerulersut malugaarput.

Aarhus Universitetimi Bioscience Institutimi lektori, ilisimatuut misissuisut 130-t akornanniittoq, Signe Normand oqarpoq.

- Naasartut ataasiakkaat takineruleriartorput, taava aamma nunap ilaani kiannerusumi naasartut qeriuaannartup masarsuinut siaruarsimasinnaapput.

Tamannalu pitsaanngilaq. Naasummi takinerunerat kianneruleriartornermut sukkatsisaataaginnarsinnaapput.

Kulstoffimmi nunamiittup affaata tungaanut issittumi qeriuaannartup masarsuttaaniippoq.

Qeriunnaartullu masarsua paqqerpat kultoffi anialissaaq, ilaatigut CO2-nngorluni angisoorsuaq, kianneruleriartornermut ilasaataasoq.

Naasut takineruleriartoraangata issittup masarsuisa paqqeriartulertarnerannut marlunnik peqquteqarpoq.

Naasut taakku portusuut ukiakkut ukiukkullu apummut paarsilluarnerussapput taamaalilluni nunamut qipittut ilillutik nuna nillertumut illersussavaat.

- Nuna siusinnerusukkut sukkanerusumik itinerusoq ilanngullugu qerisartoq ullumikkut aputeqarnerusalerpoq, nunalu itinerusumik qerisarluni, Signe Normand oqarpoq.

Kisianni naasut seqernup kiaanik tigooqqaalluarnerusarmata upernaakkut aasakkullu aput sukkanerusumik aattassaaq.

 - Taamaalilluni nuna siusinnerusukkut seqernup qinnguaanit angujuminarnerulersarpoq, qeriuaannartorlu sukkanerusumik aatsissinnaassallugu.

Ilisimatuut paasissutissanik nunatsinneersunik, Alaskameersunik, Canadameersunik, Islandimeersunik, Skandinaviameersunik Siberiameersunillu misissueqqissaarput.