Naartusunik imerajuttunik mattussisariaqanngilaq

Danskit arnat naartusut imigassamik atornerluisartut namminneq kajumissusertik aallaavigalugu naartunermik nalaanni imernaveersaarlutik mattusimaneqarallarsinnaanermik toqqaasinnaasalernissaanik siunnersuut nunatsinni aamma eqqussinnaassanersoq, Tasiilami juumuut ningiuata Susanne Houd-ip pisinnaasorinngilaa.

- Arnat namminneq aalajangissasuuppassulluunniit isumaqanngilanga Kalaallit Nunaanni taamaaliortoqarsinnaasoq. Aamma iminnginnaveersaarnermut aqqutissaasutut tamanna isiginngilara, Susanne Houd ukiuni pingasuni Tasiilami juumuut ningiuattut sulisoq oqarpoq. Erseqqissaatigaa naartusut sapinngisannguartik tamaat siunnersorluarniartaritik.

- Paasigaangatsigu naartusoq imigassamik ajornartorsiuteqartoq taava aapparisaa ilaqutaalu tamaasa ikiorniartarpavut, pisariaqartillugu inunnik isumaginnittoqarfik ikiorsiullugu. Iminngerpallaaraangatalu antabusitortittariaqartarpavut, taamaakkaangat aapparisaa ilanngullugu antabusitortittarparput. Naartusut peqqinnissaqarfimmukulanissaat aamma isumaginiartarparput, ilaannilu tarnip pissusiinik ilisimasalimmik oqaloqateqartittarlugit, Susanne Houd nassuiaavoq.

Danskit arnartaat naartutillutik imernerpaasartutut Europami rekordiliisut ullaaq tusarparput.

Anaananngortussat naartunermik nalaani imigassartorpallaartarsimanerat pissutaalluni, ukiut tamaasa meeraaqqat 400-t innarluuteqarlutik Danmarkimi inunngortarput.

- Naartunerup nalaani imigassamik atuisarneq peqqissutsimut inunngortussamullu ajornartorsiutaasorujussuuvoq, taamaammat arnat imerajuttut naartusut pinngitsaalillugit mattusimaneqartarnissaat pisariaqarpoq, May Olofsson, danskit aviisiannut MetroXpress-imut oqarpoq. Nunatsinnili taanna inassutigineqarsinnaanngitsoq Tasiilami juumooq oqarpoq.

Naartunerup nalaani imigassartorpallaarsimanerup kingunerisarpaa meeqqat amitsukujuumik kiinaqartut, siutaat appasissut avataalu amitsuaraasut, qaratsamikkullu innarluuteqartut inunngortarnerat. Tasiilami inuusaq piviusorpalaartoq paasisitsiniutitut atorneqartarpoq.

-Inuusamik imigassartorpallaartup erniaanut inoorlaamut assingusumik peqarpugut, taannalu anaananngortussanut takutittarparput, nassuiaattarlugillu imigassartorpallaaruit imaattumik meerartaarsinnaavutit, Susanne Houd nassuiaavoq, oqarluni, inuusaq ersisaarutitut atornagu pinaveersaartitsiniutitulli atortaritsik.

Susanne Houdip aamma erseqqissaatigaa illoqarfitsik Tasiilaq inuttoorsuunngimmat arnaq naartusoq aalakoorsimappat tusarneqapallattartoq, taamaattoqartillugulu arnaq piaartumik attaveqarfiginiartaritsik. Aamma oqaatigaa arnat ajornartorsiuteqarnertik ammasumik oqaluuserisinnaasaraat. Tasiilami siorna meeqqat 65-t inunngorput, taakkunanngali qassit imigassartornerup kingunerisaanik innarluuteqarlutik inunngorsimanersut kisitsisaatigineqanngillat, misissuinerit ingerlanneqarsimanngimmata.