Naartuersinnerit akeqalissanngillat
Atassutip oqaaseqartua Finn Karlsen ima tunngavilersuivoq:
- Naartuersinnerit akeqalersinnerisigut naartuersittartut ikileriarnissaat ilimaginngilarput, oqarpoq nangillunilu:
- Akiliisitsisalernikkut ilaqutariinni meerartaarusunngitsuni inunngortartut amerleriassapput. Taakkulu pisortanit isumagineqarnissamik pisariaqartitsinerat annerulissaaq, tassami siunnersuut piviusunngortinneqassagaluarpat innuttaasut atugarissaannginnerusut eqqugaasussaammata, Finn Karlsen oqarpoq.
Atassutip Maniitsumi misilittakkat pitsaasut Nunatta sinneranut siaruarterneqarnissaat piumaneruaa. Tassami Maniitsumi paasisitsiniaanikkut inuusuttunillu meerartaarsinnaalereersunik qanittumik attaveqarnikkut naartuersittartut 43 procentimik ikileriartinneqarmata.
Naartuersittarnerup akeqalernissaa Malik Berthelsenip Siumumeersup siunnersuutigaa:
- Amerlanerussuteqartut siunnersuummik itigartitsinissaat naatsorsuutigereerpara. Kisianni naartuersittarnerit amerlanerujussuat ajornartorsiutaavoq, taamaattumik tamatuma Inatsisartuni oqallisigineqarnissaa pisariaqartutut isigigakku, taamatut siunnersuuteqarpunga, Malik Berthelsen oqarpoq.