Naanak Fido-awardimik nersornaaserneqarpoq
Amerlavallaarunanngillalli taamatukanneq qimminut nersornaasiisoqartarneranik ilisimasaqartut.
Qimminut Oscarinnissutaasartoq Fido Awardsimik taaguuteqarpoq, qimmimullu ukiup ingerlanerani filmiliaritilluarnerpaamut tunniunneqartarluni.
Taamaalilluni kalaallit qimmiat qimuttoq Londonimi persuarsiornartumik naapisimaartoqarnerani sapaatiummat taama nersornaatisivoq.
Qimmeq qimuttoq Naanak filmimut Oscarinnattussatut innersuunneqartumi Gravitymi Sandra Bullockip George Clooneyillu inuttaaffigisaani peqataallatsiarpoq.
Filmilli Gravityp filmiliarineqarneranut atatillugu minutsinik arfineq-marlunnik sivisussusilimmik filmiliortoqarpoq, tamatumani piniartoq qimmiilu sikumiittut piviusumik filmiliarineqarlutik.
Filmi naatsuliaq taaguuteqarpoq 'Aningaaq' Oscarinnattussatullu innersuunneqarluni, ukiumoortumillu sapaatiummat filmfestivalertoqarnerani ukiup qimmianik Fido Prisenimik taaguutilimmik kalaallit qimmiat miagguullammak nersornaatisivoq.
Qimmeq taanna soorunami Londonimi peqataanngilaq, kalaallilli qimmiat taanna nunani allani maluginiarneqarluassaqqaarpoq, pingaartumik filmi naatsuliaq aappaagu Oscarinnatsinneqassappat.