Naammagittaalliutit ukiuni marlunnik utaqqineqartariaqarput
Tamanna Isumaginninnermi Naammagittaalliuuteqartarfimmi siulittaasumit Naja Joelsenimit KANUKOKA-llu pisortaanit Martha Labansenimit apeqquserneqarpoq, suliat naammaginanngitsumik suliarineqartarnerat ilaatigut uparuartorneqarluni. Bebiane Enoksen tapiiffigineqarnissaminut kommunimut qinnuteqaateqarsimagaluarpoq, itigartinneqarlunili.
Tamanna pillugu ima oqarpoq:
- Taamanikkut itigartinneqaratta misigissutsitsinnut attuisorujussuuvoq, aningaasammi atorfissaqarteqigatsigik. Inuttut naleqassutsimik attorneqarnaqaaq. Isumaqarpungalu uangaannaasimanngitsoq taama misigisaqartinneqartoq. Inuppassuaqarsimassaaq uattut misigisimasunik, Bebiane Enoksen oqarpoq, itigartitsissuteqarnerlu naammaginagu, nassuiaatitaqartinnagu itigartitsisoqarsimanerarlugu.
Bebiane Enoksen Nuummi maanna najugaqarpoq. Arnani napparsimalluni peruluttoq orninniarlugu tapiiffigineqarnissamut ukioq manna marsip tallimaanni qinnuteqaateqaraluarpoq, itigartinneqarlunili.
Ikinngutiminit ilaquttaminillu atorniarluni kujataanut angalanissamut akissaqalerpoq. Arnani ullualunnguit najoreeraalu, arnaa toqukkut qimaguppoq.
Qinnuteqaammut itigartitsinermut nassuiaatit naammaginngilai, akissuteqaatisinissamullu ukiuni marlunni utaqqisariaqarnini apeqquserlugu:
- Isumaginninnermi Naammagittaalliuuteqartarfimmi suliamut tunngatillugu ukiut marluk utaqqisinnaasugut allagaqaatitigut paasitinneqarpugut. Qinnuteqaateqarama neriuutigigaluarpara sapaatip-akunnerup tulliani tusagaqassallunga, taamaattoqanngilarli. Allakkatigulli paasitinneqarpugut ukiut marluk. Allakkat ukiut marluk qaangiuppata sumut atussagakkit, Bebiane Enoksen aperivoq.
