Immikkut ilisimasalik Naammagittaaliorneq pinnagu tatigeqatigiinneq
Naalagaaffeqatigiinni nunanut allanut tunngasunik politikkikkut angusaqartoqassappat, taava Danmarkip Kalaallit Nunaatalu akornani tatigeqatigiinerusoqartariaqarpoq, Jon Rahbek-Clemmensen, Syddansk Universitetimi adjunki taama oqarpoq.
Jon Rahbek-Clemmesen nalunaarusiamik Grønlandskortemik allaaserinneqataanermini Danmarkip Kalaallit Nunaata USA-lu akornanni pissutsit pillugit atukkioqataavoq, tassani Danmarkimi Kalaallit Nunaanni USA-milu atorfillit aamma immikkut ilisimsallit politikerillu oqaloqatigneqarlutik.
Naalagaaffiit Peqatigiinnut maalaaruteqarneq iluaqutaanngitsoq
Vittus Qujaukitsup Danmark Naalagaaffiit Peqatigiinnut maalaaruteqarneranut pissutaasoq Jon Rahbek - Clemmensenip paasisinnaanerarpaa, kisiannili taamatut maalaaruteqarneq ajornartorsiutip qaangerneqarnissaanik kinguneqassangatinngilaa, killormuanillu pisoqassasoq taanna isumaqarpoq.
Naalagaaffeqatigiit iluamik ingerlasumik Nunanut allanut politikkeqassagunik tatigeqatigiinnermik pilersitsinissaq aalajangiisuuvoq kingullertigullu pisut tamanna iluaqutigisimanngikkaat takuneqarsinnaavoq, Rahbek oqarpoq.
Vittus Qujaukitsup Naalagaaffiit Peqatigiinnut maalaarutaanut ilaavoq Pituffimmi kiffartuussinissamik isumaqatigiissut suli naammassineqanngitsoq, tassani Namminersorlutik Oqartussat ilungersuuteqarput amerikamiut Pituffimmi sakkutooqarfeqarnerannik aningaasatigut pissarsissutigineqarsinnaanera.
Tamatumunngali Kalaallit Nunaat pisuuteqataasoq Rahbeck oqarpoq.
Misissuinerit takutippaat Namminersorlutik Oqartussat aamma pisooqataasut, susoqalerneranik malinnaasimannginnamik.
Kalaallit Nunaata Danmarkillu akornanni tatigeqatigiinneq
Taamaattumik Kalaallit Nunaat aamma Danmark tatigeqatigeeqqilissagunik aallartitat atorlugit USA-mik isumaqatiginniartariaqarput angusaqarlutillu.
Tulluarnerussagaluarpoq danskit tungaanniit kalaallinut tatiginninnerulernermik iliuuseqartoqartuuppat aamma illuanut kalaallit tunganniit Danmarkip naalagaaffeqatigiinni nunanut allanut tunngasunut politikkimik isumaginnittuusumut tatiginninnermik takutitsisoqartuuppat, tamannami tamarmik soqutigisarimmassuk, Jon Rahbek-Clemmensen taama oqarpoq.
John Rabek-Clemmensenip Inatsisartuni nunanut allanut tunngasunut sillimaniarmullu ataatsimiititaliami siulittaasoq Ane Hansne isumaqatigaa taanna sisamanngornermi oqarami, Pituffik pillugu ajornartorsiut amerikamiullu sakkutooqarfiini qimaannakkat pillugit oqaloqatigiinneq aqqutissaasoq qunusaarinerlu pinnagu.