Naamaarutaasinnaasut nioqqutaajunnaarsinnaapput
Meeqqat inuusuttullu gas-imik naamaartarnerat ima ajornartorsiutaalertigaaq allaat gassit tunisaanerat inerteqqutaalersinnaasoq, peqqissutsimut naalakkersuisoq Asii Chemnitz Narup oqarpoq.
- Peqqissutsimut pisortaqarfik suliakkerpara ikittaatit imassaat qillertuusaniittut ikittaatillu ataasiartarissat kiisalu tipigissaatit seqqittaatiniittut pisiniarfinni tuniniaaqqusaajunnaarnissaat aqqutissiuunniarlugu, Asii Chemnitz Narup oqarpoq.
Paasititsiniutit annertoreeraluaqisut ajornartorsiut taamaaginnarpoq.
- Naamaartoqartarnera ilaanni unikaallattarpoq ukioq mannali atasuinnarmik naamaatoqartarpasippoq, tamannalu tupaallannarmat qanoq iliuutsigut sakkortusartariaqarpavut, oqarpoq.
Taanna aperaarput, inerteqquteqartitsineq immini aamma navianarsorinnginneraa, allanik naamaarutaasinnaasunik meeqqat nassaarsiulersinnaanerat eqqarsaatigalugu.
- Meeqqat inuusuttullu peqqissusiat qulakkeertuarlugu suliniuteqartuartariaqarpugut. Matumani taakku peqqissusiat ulorianartorsiortinneqarpoq, sianiutaat qarasaallumi ajoquserneqarsinnaapput, taamaammat pissutsit tamakku isiginngitsuusaaginnarsinnaanngilagut, Asii Chemnitz Narup.
