Naamaartartut Danmarkimi ikiliartorput

Siullerpaamik ikittaatit imassaannik gassimik naamaarnermiit qarasaq milliallattarpoq, akornuserneqarnerlu qaangiunneq ajorpoq. Oqariartuut taanna Danmarkimi inuusuttunit kiisami paasineqalersimagunarpoq. Tassami inuusuttut aanngajaarniummik taassuminnga navianartumik misiliisimasut 8 procentimiit 4 procentimut appariarsimapput.

19-inik ukiulik Bjørn Brodersen qaammat ataaseq sinnerlugu ullut tamaasa ikittaatip imassaanik gassimik naamaartarpoq.

- Sukkasuumik sunniuttarpoq, akikinnerulluni, naamaareernermilu biilertoqarsinnaalluni. Bjørn Brodersen nassuiaavoq.

Bjørnip atornerluinera 2005-imi oktobarip 19-anni tassanngaannaq unitsinneqarpoq.

Ikinngutinilu sisamaallutik naamaartillugit ini naamaarfigisaat qaarpoq, Bjørn Brodersenilu kiinnamigut uutiterujussuarpoq. Ikittaatit imassaat gassi taamaallaat qaarsinnaanngilaq, aammattaarli naamaarnermit siullermiit qarasaq milliartortilertarpaa. Tamannalu inuusuttunit paasineqarsimagunarpoq.

Bjørn Brodersenip ajutoornini maanna eqqarsartaatsimigut qaangersimalerpaa, taamaallaat qilerui takuneqarsinnaapput. Taakkualu inuusuttut oqaluttuarfigigaangamigit takutittarpai.

- Qileqqukka takutikkaangakkit inuusuttut eqqarsariartarput, Bjørn Brodersen, oqarpoq.