Naalungiarsuup nassaarineqartup arnaa ujaaraat
Politiit angut arfininngormat ualikkut qimmiminik aneerussisoq atuarfiullu eqqaani arnamik inuusuttumik takunnissimasinnaasoq, ullumikkut ujaaraat.
Isiginnittut angut arnarlu Hee-p atuarfiata eqqaani ualikkut nalunaaqutaq ataatsip marlullu akornanni takusimavaat. Taakkua ingerlaqatigiissimanngillat tamarmillu immikkut allamut ingerlallutik, angutilli arnaq takusimasinnaallugu.
Politiit isumaqarput arnaq meeqqamut attuumassuteqarsinnaasoq angutillu aamma immaqa arnaq takusimassallugu.
- Angut pillugu arlalinnik saaffigineqarpugut. Kinaasimasinnaanera pillugu innersuussutit assigiinngitsut takkussimapput, sulili kinaassusersivinngilarput. Oqaloqatigerusunneranut pissutaavoq, taassuma arnaq pinngitsoorani takusimassammagu taamaalillunilu immaqa kinaassusia pillugu allatut nassuiaateqarsinnaalluni, Ringkøbingimi politiit pisortaat Jens Ole Pedersen oqarpoq.
Naalungiarsuk - nukappiarannguaq inunngorneranit taamaallaat sapaatip akunnera ataaseq qaangiuttoq nassaarineqartoq - atuarfiup eqqaani orpikkani allarummik poorlugu qimanneqarsimavoq. Nukappiarannguaq ajunngilaq inuunerminillu navianartorsiorani. Maannakkut Herningip napparsimmavianiippoq. Meeraaraq qaamasumik ameqarpoq 3 kiilu 340 gramminillu oqimaassuseqarluni.
