Naalungiarsuk qulinik qaammatilik ilisarisimanngisaminut utissaaq
Nukappiaqqap anaanavia Danmarkimi efterskolerpoq, anaanavimminilli aanaavata, arlalissunnguariaannarluni takusimasaata, nukappiaraq tigummiumallersimavaa. Tassa nukappiaqqap ilaqutaviisa qitornavissianngortitsiniarnertik nukappiaqqap inunngorneraniit sapaatip-akunneri arfineq-marluk qaangiutiinnartut peqqissimissutigilerpaat. Aatsaalli qaammatit arfineq-pingasungajaat ingerlareersullu nukappiaqqap massakkut angajoqqaarsiarisaasa aanaavanut aqagu arfininngornermi tunniutissavaat, aanaavatalu illoqarfimmut allamut timmisartoqatigissavaa.
Taama aalajangerneq Qeqqata Kommuniata aalajangiusimavaa, naak nukappiaqqap inunnut nalulluinnakkaminut nooriataarneqarluni tamanna eqqarsartaatsimigut ilungersunartorsiutigerujussuassagaa tarnip pissusaanik ilisimasallip ernummatigigaluaraa.
– Qeqqata Kommunia sumiginnaasutut Peqqissutsimut Ilaqutariinnermullu Pisortaqarfimmut unnerluutigaarput. Suliami tassani meeqqamut ajunnginnerusussat eqqarsaatigineqarsimanngilluinnarput, ataatarsiaasoq, aterminik saqqummiusserusunngitsoq, oqarpoq. Nukappiaqqap angajoqqaarsiai Maniitsumi peqqinnissaqarfimmi marluullutik suliffeqarput - ilaqutaviilu Sisimiuni najugaqarput.
