Naalungiarsuit qiasarnertik ajoqutigisinnaavaat
Naalungiarsuit sivisuallaartumik qiasarnermikkut qaratsatik ajoqusersinnaavaat. Tuluk ilisimatooq taama isumaqarpoq.
Allattoq mlk
apriilip 26-at 2010 13:11
Tarnip pissusaanik ilisimasalik Penelope Leach atuakkami ”The Essential First Year – What Babies Need Parents to know”-imi ima nassuiaavoq: Naalungiarsuit qiatiinnarneqartut qaratsamikkut innarlerneqarsinnaapput. Ilikkarsinnaanerat taamaalilluni akornuserneqarsinnaavoq. Jp.dk taama allappoq.
Naalungiarsuit sivisuumik orninneqarnatillu qianermikkut hormoni stressilersitsisartoq cortisol qaratsaminni pinngortittarpaat.
Taamaammat angajoqqaat naalungiarsuutitik qiatiinnarlugit sininniarnermik ilinniartittarniarpatigit illersorneqarsinnaanngitsoq ilisimasalik isumaqarpoq.
Meeqqat qiajunnaaraangamik sininniarnermik ilikkarsimanerannik isumaqarneq ajorpoq, orninneqanngiinnaramiguku qiajunnaaginnartartut, Penelope Leach oqarpoq.
