Naalakkersuisuutitaqartut ingerlaannassagunarput

Savalimmiuni politikkikkut illuatungeriit annerit – Sambandspartiet – Danmarkimut qanimut suleqateqarnissamik suliniuteqartut aamma Republikanerit, namminersulivinniat – inatsisartussanut januaarip ulluisa 19-ianni qinersisoqalerpat taaguunneqarnerpaanissaat, Gallupip qinersisartunik isumasiuinerata takutippaa.

Partiit pineqartut ima taaguunneqartigissapput, inatsisartuni tamarmik immikkut arfineq-pingasunik issiatitaqalissallutik.

Isumasiuinup aviisimi Dimmalætting-imi saqqummiunneqartup taamaalilluni ersersippaa, maanna naalakkersuisuutitaqartut, Sambandspartiet, Socialdemokratiet aamma Folkeflokken naalakkersusisuutitaqaannassasut.

Savalimmiuni illuatungiliuttuupput Republikanerit, Centerpartiet (qiterlernit) aamma Selvstyrepartiet (namminersulernianit).

Centerpartiet (qiterliit) siuariarnerpaanissaa, taamalu inatsisartuni pingasunik isertitaqarnissaat ilimagineqarpoq. Selvstyrepartiet (namminersulerniat) ataatsimik isertitaqassangatinneqarput.