Naalakkersuisut: Upernaviup eqqaani kapitittut ikippallaaqaat
![](/sites/default/files/styles/image_934x467/public/article_images/20210317130144683_1000.jpg?itok=YqlcsTu3)
Kapitittut amerlannginnerat peqqutigalugu Upernavimmi, Naajaani, Aappilattumi, Kangersuatsiami Upernavik Kujallermilu ulluni tulliuttuni kapuisoqaqqissaaq.
Taakkunanilu akiuussutissamik kapitinnissamut akuersinissaq pisortat kaammattuutigaat.
Alussaatit talermut nippusimasut assitaliussuunneqartut aammalu uppernarsaatitaqanngitsumik kapitereernermi kingorna assersuutigalugu timip kajungerisamik peqarnerulertarnera oqaatigineqartarsimavoq.
- Tusatsiakkat eqqunngitsut taakku ammaaqqinnissamut pilersaarutitsinnut, inuiaqatigiillu ataatsimut isigalugit peqqissusaannut, aammalu ajornerpaamik pisoqassappat inunnut annertuunik kingunerlutsitsisinnaapput, Naalakkersuisut tusagassiuutinut nalunaarummi oqarput.
Naalakkersuisut: Innuttaasut sunnerneqarput
Tusatsiakkat inuit ilaannut suunngitsuusinnaapput quianarsinnaallutillu oqartussaasuniilli qularineqanngilaq akiuussutissanik kapuinermi pilersaarutinut pitsaanngitsumik sunniuteqartoq, aammalu innuttaasut ilaat sunnerneqarsimasut paasineqarpoq, taamaalillutik tusatsiakkat eqqunngitsut upperalugit ingerlateqqittarlugillu.
Kalaallit Nunaanni inuit 20.000-it sinnerlugit akiuussutissamik kapitereerput.
- Ilaquttat ikinngutillu akiuussutissanik kapitissimasut apersukkit taamaaliornikkut tusatsiakkat eqqunngitsut ingerlateqqinnaveersaarneqarsinnaapput. Akiuussutissanik kapuineq pillugu paasissutissanik siammasinnerusumik ujarleruit, kapitinnermi iluaqutissarpassuit annertunerusumik paasisaqarfigisinnaavatit, Naalakkersuisut taama siunnersuipput.
Upernavimmi unnugu nalunaaqutaq 18.45-mit kapuisoqassaaq.