Demokraatit aalisarnermut inatsisissaq kinguartikkusukkaat
Naalakkersuisut tamat oqartussaaqataanerannut ataqqinninnginnermik takutitsipput. Demokraatinit, Nivi Olsen taama isornartorsiuingaatsiarpoq.
Taassuma Inatsisartunit politikerit 31-t Naalakkersuisut aalisarnernut inatsisissatut siunnersuutaata kingunerluutissaata misissuiffigeqqissaarneqarneranik naatsorsuiffigineqarnerannillu tigusaqarsimannginnerat paasisinnaanngilaa. Tamatuma saniatigut politikerit inatsisissatut siunnersuut taanna pissarsiarisimanngilaat.
- Naalakkersuisut sualummillu Aalisarnermut Piniarnermullu Naalakkersuisoq taamatut pissusilersornermikkut takutippaat ernummatigisariaqartumik kikkut tamat oqartussaaqataaneranni suleriutsinut ataqqinnissuseqaratik. Aalisarnermut inatsit pingaarutilerujussuuvoq aamma taamaattumik iluaqutaanngilaq piffissaq kingullerpaarpaaq atorlugu siunnersuummik Inatsisartunut saqqummiussiniarneq, Inatsisartuni illuatungiliuttunit Demokraatinit isornartorsiuineq taama allassimavoq.
IA aamma paasissutissarserusuttoq
Naalakkersuisoqatigiillu iluanni Naalakkersuisut paasissutissiinnginnerannik aamma isornartorsiuisoqarpoq. Aningaasanut inatsisissatut siunnersuut sapaatip akunnerani matumani aappassaaneerneqarmat IA-miit, Bendt Kristiansen ima oqarpoq:
- Aalisarnermut inatsisissap siullermeerneqarnissaa aanaralaarsuugaluartoq, inatsisissatut siunnersuut Inatsisartunut saqqummiunneqanngilaq. Taamaammat Naalakkersuisut aalisarnermut inatsisissap ukiakkut ataatsimiinnermi matumani oqallisiginissaa piviusorsiortumik angumerisinnaaneripput apererusunnarput.
Nivi Olsen isumaqarpoq aalisarnermut inatsit suliarineqarnissaa upernaaq 2018-imi ataatsimiinnissamut kinguartinneqartariaqartoq, taamaalilluni inatsisissatut siunnersuut torersumik suliarineqarsinnaassammat.