Naalakkersuisut sullisseqataapput
Isumasioqatigiinneranni takornariaqarnermut naalakkersuisoq Siverth K. Heilmann ammaalluni oqalugiarnermini ilaatigut ima oqarpoq: -Takornariartitsinermi immikkoortuni assigiinngitsuni siuariartornissamut Nunatsinni periarfissat pitsaasut iluaqutigissagutsigit, soorlu hotellini neriniartarfinnilu, assartuinermi misigisaqartitsiniartunilu pigineqartut, taava ataatsimoorluta kivitseqatigiittariaqarpugut.
Naalakkersuisut aamma takornariaqarnermut annertunerusumik suliniuteqarnerat oqaatsinik ukuninnga oqarluni erseqqissarpaa:
- Inuussutissarsiutinut ilinniartitaanerit nutarteriffigineqarnissaat maannakkut sulissutigaarput, taakkuninnga atuisut annertunerusumik toqqaannarnerusumillu siunissami sunniuteqartitsilersussamik. Neriuppunga pimoorussilluni kinguneqarluartussamillu suliniuteqarnikkut tamanna iluaqutiginiarumaarissi, Siverth K. Heilmann takornariaqarnermut naalakkersuisuusoq oqarpoq nangillunilu:
- 2008-mut aningaasanut inatsisip akuerineqarneratigut Inatsisartut Kangerlussuarmi ajornartorsiutaasartut paasineqarsimasut qaangerneqarnissaannut mittarfeqarfinnilu ammasarfiit nikerartinneqarnissaannut iliuuseqarsimapput, soorlu aamma Nunatsinniit aamma Nunatsinnut attaveqaatit nutaat piginnaasatigut pitsaanerusumik atuinissamut tunngavissiilluarsimasut.