Naalakkersuisut suleqatigiinnissamik kissaateqarput
Erngup nukinganik nukissiorfiliornissamut, tassanngaaniillu aatsitsivissamut aqqummut tunngassuteqartoq, kiisalu alumiumik aatsitsivissaq, Namminersornerullutik Oqartussanit Alcoamillu ataatsimoorussinikkut pigineqarnissaat Inatsisartut ataatsimiinissaannut Naalakkersuisunit aalajangiiffigisassanngorlugu inassutiginiarpaat.
Pissusissamisoornerussagaluarpoq Alcoa’p kisermaassilluni aatsitsivissaq piginniffigiguniuk, erngup nukinganik nukissiorfik, tassanngaaniillu aatsitsivissamut aqqut, Namminersornerullutik Oqartussat kisermaassillutik piginniffigalugu.
Suleqatigiinnissamut siunnersuut, Naalakkersuisunit inassutigineqarniartoq, isumaqarpoq, ajunaarutaasinnaasut iluanaarutaasinnaasullu suleqatigiit taamaalillutik avissinnaassagaat. Namminersornerullutik Oqartussat sanaartornikkut aningaasartuuteqarnerunissaannik tamanna malitseqassaaq, tassa 2,5 milliardi koruunit 3 milliardi koruunilluunniit nunanit allaniit immaqa atorniarneqartariaqassapput.
Periarfissat pingajuat tassaasinnaavoq aatsitsivissaq erngullu nukinga atorlugu nukissiorfissaq Alcoa’p nammineq sanatippagit aqullugillu, taamaalilluni imermik isumalluutit kisimi oqartussaaffigissagaluarlugit. Taama aaqqiisoqassappat Namminersornerullutik Oqartussanut akikinnerpaassagaluarpoq, aluminiumilli aatsitsiviliornissaq kalaallinut taava sunniuteqarpallaassanngilaq, iluanaarutillu appasinnerpaaffimmiinnissaat naatsorsuutigisariaqarpoq.
Aluminiumik tunisassiorneq siusinerpaamik 2014-imi aallartissinnaassaaq. Aatsitsiviliassap Maniitsup eqqaani inissinneqarnissaa Naalakkersuisut ippassaq inassutigaat.
