Naalakkersuisut siuttuat: Uummatikkut najorpassi

Iqalunni ippassaani ikuallarujussuartoqarneratigut inuit 100-t angerlarsimaffeerupput.

Inneq qaminneqareermat ilumut inuit tamakkerlutik aniasimanersut misissorneqarpoq. Inuit marluk ikuallagussaasimasutut naatsorsuutigineqarput, pisortalli toqusoqarsimanera massakkorpiaq uppernarsarsinnaannginnerarpaat.

Inissiani ikuallattuni najugallit amerlanersaat, maanna angerlarsimaffeeruttut, illoqarfiup ilisimatusarfiani Arctic College-imi ilinniartuupput, taakkunanngalu 50-it meeraapput inuusuttuaqqallu 18-it inorlugit ukiullit.

Angerlarsimaffeeruttut amerlanersaat maanna inissikkallarneqareerput, ilaatigut akunnittarfinni inuinnarnilu inissikkallarneqarlutik. Iqalunni inissaaleqisoqareeqaaq, tamannalu ajunaarnersuarmik annerulersitseqataalluni.

Canadamiulli ikiuullutik aallartereerput. Canadap Røde Korsia ikiorsiissutissanik ikiuiartortunillu Iqalunnukartitsereerpoq, tassalu angerlarsimaffeeruttut inissinneqarnissaasa saniatigut atisaqarnissaat nerisaqarnissaallu maanna salliutinneqarlutik.

Nunavummi naalakkersuisuni siulittaasoq Eva Aariak oqaaseqarami ikuallannermit eqqugaasut misiginneqatigingaarnerarpai, qatserisartullu 50-inik issileruttortoq sulilluarsimanerat qujassutigalugu. Tamatuma saniatigut Iqalunni Nunavummilu qatserisartut atugarisaannik pitsanngorsaavigineqarsinnaanersut misissortinnialerlugu.

Iqalunni ikuallanneq qanoq aallartissimanersoq Nunavummi oqartussaasut misissorlugu maanna aallartereerpaat.