Naalakkersuisut siunnersuutaat IA-mit akerlilerneqarpoq

Inuit Ataqatigiit inatsisartuni ilaasortaatitaasa Siumut isumaqatigaat. Simumeersoq Ruth Heilmann tassani sakkortuumik isornartorsiuivoq,

ukioq taanna højskolit pillugit inatsisissap atuutilerfissaani aningaasanut inatsisissatut siunnersuummi højskolinut aningaasaliissutit 3.5 millionit koruuninik ilanngarneqarnissaat suinnersuutigineqarmat.

Inuit Ataqatigiit gruppiata sipaarnissaq aamma isumaqatigiinngikkaa, politikkikkut oqaaseqartartoq Aqqaluaq B. Egede tusagassiuutinut allappoq.

Naak højskolit pillugit inatsisissaq, allagartartaarutaasinnaasumik ingerlaqqissutaasinnaasumillu amerlanerusut ilinniartinneqarsinnaalernerannik kinguneqartussaq, iluarisimaaraluarlugu, aamma illua tungeqartitsivoq:

- Taamaakkaluartorli pingaaruteqarpoq højskoleqarnerup isumarpiaa attattuassallugu. Taamaammat Inuit Ataqatigiit tapiissutit tunngaviusumik højskolit ingerlanerannut atuuttut ilanngarneqarnissaat isumaqatiginngilaat, Aqqaluaq B. Egede allappoq tikkuarlugulu, højskolit Nunatsinni pisariaqartinneqartut, taakkualu aqqutigalugit inuiattut pingaartitavut, kulturerput, kinaassutsitsinnillu ilisimaarinninnissarput ineriartortitsiuarnissarpullu qulakkeerneqartarmat .

Knud Rasmussenip Højskoliani Sisimiuniittumi forstanderip, Johanne Olsenip, Naalakkersuisut sipaarniarnerat isornartorsiorpaa.

- Sipaarfigineqassagutta, taava højskoleerutissuugut. Taama oqaraanni immaqa ajunnginneruvoq, Johanne Olsen tallimanngormat oqarpoq.